Класічны глінтвэйн ці збіцень? Гарбузовы латэ ці гарбата на зёлках? А мо, гэтай восенню паспрабаваць розныя напоі для сугрэву, у тым ліку – тыя, якія спрадвеку пілі беларусы? Выбірайце, што вам найбольш да спадобы, з нашага топу.
1. Журавінавая гарбата
Вам спатрэбяцца:
• апельсін – 60 г
• лімон – 50 г
• апельсінавы сок – 40 мл
• цукровы сіроп – 50 мл (можна растварыць 50 г цукру ў 50 мл вады)
• журавіны – 50 г
• карыца – 1 палачка
• кіпень – 400 мл
Як прыгатаваць:
Апельсін нарэзаць невялікімі кавалачкамі і разам з журавінамі пакласці ў імбрык. Дадаць апельсінавы сок, цукровы сіроп і палачку карыцы. Заліць усё кіпенем, даць настаяцца цягам 15 хвілінаў.
2. Гарбата на зёлках
Вам спатрэбяцца:
Зёлкі: кветкі ліпы, календулы, рамонка, лісты яблыні, грушы, вішні, рабіны чарнаплоднай, плады шыпшыны, рабіны чырвонай, трава і лісты скрыпеня (іван-чаю), чабора, мяты перачнай, ісопу, мацярдушкі (душыцы, разам з кветкамі).
Як прытагаваць:
Змяльчыць зёлкі і змяшаць. У імбрык дадаць 3 сталовыя лыжкі сумесі зёлак, заліць кіпенем, даць настаяцца 10 хвілін і піць.
3. Безалкагольны глінтвэйн
Вам спатрэбяцца:
• яблыкі – 4 – 6 штук
• апельсін – 1 штука
• лімон – 1 штука
• карыца – 1 чайная лыжка
• гваздзіка – дробка
• кардамон – дробка
• імбір – дробка
• вада – 2 – 3 літры
• цукар – паводле смаку
Як прыгатаваць:
Яблыкі памыць і разрэзаць на 6 частак, пасля пакласці у рондаль. Да яблыкаў дадаць некалькі кавалачкаў апельсіну і лімону, карыцу, гваздзіку, імбір і кардамон. Усе перамяшаць. Напіць крыху вады і тушыць яблыкі са спецыямі прыкладна 15 -20 хвілінаў на невялікім агні. Пасля дадаць у рондаль астатнюю ваду і давесці да кіпення. Даць пакіпець 5 хвілінаў. Напой можна працадзіць праз сіта, а можна проста пачакаць, калі яблыкі апусцяцца на дно рондалю. Па смаку можна дадаць цукар. Піць абавязкова цёплым.
4. Збіцень – “беларускі глінтвейн” на мяду.
Старажытны гарачы напой, які пілі, каб сагрэцца і абараніць сябе ад прастуды.
Вам спатрэбяцца:
• вада – 1 літр
• мёд – 3 сталовыя лыжкі
• сухая мята – 1 сталовая лыжка
• гваздзіка – 2 кветкі
• аніс, меліса, ядловец, каляндра, чабор – па дробцы.
Як прыгатаваць:
Закіпяціць ваду, дадаць у кіпень мёд, варыць 10 хвілінаў. Потым дадаць мяту, спецыі, зёлкі і, павольна памешваючы, варыць яшчэ хвілінаў 5 – 7. Піць збіцень толькі цёплым, каб адчуць увесь смак спецыяў.
5.Класічны глінтвэйн
Вам спатрэбяцца:
• кардамон – 8 струкоў
• гваздзіка – 10 кветак
• душысты перац – 5 зярнятак
• каляндра – 1 чайная лыжка
• аніс – 4 зорачкі
• бадзьян – 4 зорачкі
• сухое чырвонае віно – 750 мл
• апельсін – 3 – 4 долькі
• карыца – 3 палачкі
• цукар – 5 сталовых лыжак.
Як прыгатаваць:
Струкі кардамону трэба раздавіць (можна гэта зрабіць шырокім бокам нажа). Пакласці кардамон, гваздзіку, душысты перац, бадзьян, палачкі карыцы, каляндру і аніс у рондаль. Апельсін парэзаць долькамі. У рондаль уліць віно, накрыць крышкай, давесці да кіпення і адразу зняць з агню. Дадаць долькі апельсіну, цукар, усё перамяшаць. Закрыць крышкай і даць настаяцца 15 хвілінаў.
6. Гарачае піва
Вам спатрэбяцца:
• піва – 1 літр
• цукар – 1 – 2 сталовыя лыжкі
• гваздзіка – 3 – 4 кветкі
• карыца молатая – 1 дробка
• яечныя жаўткі – 3 штукі
• лімон – 1 штука
• апельсінавая цэдра – паводле смаку.
Як прытагаваць:
Піва нагрэць у рондалі да 70°C разам з карыцай, гваздзікай і цэдрай адного лімону. Яечныя жаўткі расцерці з цукрам да з’яўлення пены і павольна ўліць у рондаль з гарачым півам. Зрабіць агонь крыху меншым і варыць, пастаянна перамешваючы, пакуль сумесь не загусцее. Увага: сачыце, каб гарачае піва не закіпела другі раз, бо інакш жаўткі зварацца.
Калі напой загусцее, яго трэба зняць з пліты, разліць у вялікія стаканы, па жаданні дадаць апельсінавую цэдру і піць. Калі дадаць у напой некалькі лыжак мёду, атрымаецца яшчэ і карысны сродак супраць ангіны і кашлю.
7. Мараканская кава са спецыямі
Вам спатрэбяцца:
• кава ў зернях – 0,5 стакана
• молатая карыца – 1 сталовая лыжка
• гваздзіка – 2 зубчыкі
• зялёны кардамон – 3 зерні
• мускатны арэх – чвэрць чайнай лыжкі
• молаты імбір - чвэрць чайнай лыжкі
• чорны перац - чвэцрь чайнай лыжкі
Як прыгатаваць:
Каву трэба выбіраць моцных сартоў, сярэдняй ці цёмнай абжаркі. Зерне змалоць разам са спецыямі. На адну порцыю – ад адной да дзвюх сталовых лыжак сумесі. Заварыць усё ў турцы. Вельмі смачна атрымліваецца, калі ў гатовы напой дадаць гарачае малако. Піць лепш адразу пасля прыгатавання.
8. Гарбузовы латэ
Вам спатрэбяцца:
• гарбуз – 200 г ці 4 сталовыя лыжкі гарбузовага пюрэ
• малако – 250 мл
• натуральная кава – 120 мл
• цукар – 1 сталовая лыжка
• ванілін – дробка
• карыца – 0,5 чайнай лыжкі
• арэх мускатны – 0,25 чайнай лыжкі
• вада – 2 сталовыя лыжкі.
Як прыгатаваць:
Мякаць гарбуза нарэзаць кубікамі, скласці ў шкляную ці керамічную форму, дадаць 2 сталовыя лыжкі вады і запякаць у духоўцы, разагрэтай да 200°C прыкладна 25 – 30 хвілінаў.
Заварыць каву, пажадана, свежамолатую.
З запечанага гарбуза зрабіць пюрэ. Пакласці яго разам з малаком, цукрам, ванілінам, карыцай і мускатным арэхам (можна дадаць дробку молатага імбіра ці гваздзікі па смаку) у невялікі рондаль, паставіць на павольны агонь. Не даводзячы да кіпення, узбіць міксерам ці венчыкам да з’яўлення пенкі. Выліць сумесь у высокі стакан. Дадаць моцную свежазвараную каву. Можна ўпрыгожыць узбітымі вяршкамі і пасыпаць какава ці карыцай.
Ганна Ганчар belsat.eu
