Афіцыйны продаж электраседана пачаўся 15 кастрычніка, і вось першыя аўтамабілі сталі з’яўляцца ў салонах беларускіх дылераў.
Цана на навінкі пачынаецца ад Br 106,9 тысячы (гэта крыху менш за $ 32,3 тысячы) – столькі каштуе заднепрывадная версія, піша аўтамабільны партал av.by. Цана на поўнапрывадную версію вагаецца ў залежнасці ад камплектацыі ад Br 119,9 тысячы да Br 121,9 тысячы (каля $ 36,2 тысячы і $ 36,8 тысячы).
Паводле генеральнага дырэктара «BelGee» Генадзя Свідэрскага, у першую партыю «Geely E8» увайшлі 87 аўтамабіляў, да канца года будуць яшчэ тры пастаўкі. Збіраць у Беларусі аўтамабіль не плануюць.
Мадэль «Geely E8» супастаўляюць з аўтамабілем «Audi A6», яна мае выбітны каэфіцыент аэрадынамічнага супраціўлення (0,199) і здольная разганяцца да 100 км/г за 6 секундаў.
У базавай версіі ў аўтамабіля прадугледжаны задні прывад і матор на 272 к. с., ёмістасць батарэі складае 62 кВт∙г., і на адной заладаванні аўтамабіль можа праехаць да 550 кіламетраў. Ёсць таксама версія з больш магутнаю батарэяй.
Часткаю медыясістэмы аўтамабіля стаўся 45-цалевы экран з раздзяляльнасцю 8K, на які выводзіцца разнастайная інфармацыя, патрэбная падчас кіравання аўтам. Таксама экран можна выкарыстоўваць як тэлевізар.
Раман Шавель belsat.eu
