З пачатку 2024 году пры затрыманні або спыненні нерэгулярных мігрантаў з Беларусі пацярпелі і атрымалі раненні ўжо 63 польскія вайскоўцы.
Адпаведную заяву на паседжанні польскага Сейму 17 кастрычніка зрабіў дзяржаўны сакратар Міністэрства нацыянальнай абароны Польшчы Павал Бэйда, паведамляе радыё «Свабода».
Актыўнасць нерэгулярных мігрантаў на польска-беларускай мяжы ў 2024 годзе павялічылася, адзначыў ён.
«У перыяд з 1 студзеня па 15 кастрычніка 2024 году на ўчастку мяжы з Беларуссю зафіксавана амаль 28 тысяч спробаў незаконна перасекчы мяжу. Гэта больш, чым за ўвесь мінулы год — летась зафіксавана 25 702 спробы незаконнага перасячэння мяжы», – распавёў Павал Бэйда.
Паводле яго, сярод выяўленых замежнікаў пераважалі грамадзяне Сірыі, Афганістану, Самалі, Эрытрэі, Індыі, Эфіопіі і Емэну.
Бэйда таксама адзначыў, што ў апошнія тры тыдні колькасць спробаў нелегальнага перасячэння польска-беларускай мяжы знізілася і цяпер захоўваецца «на ўзроўні 60 спробаў у дзень», аднак, «зыходзячы з гістарычных звестак, трэба ўлічваць, што ўзровень міграцыйнага ціску можа ўзрасці на працягу наступных месяцаў», дадаў ён.
У сувязі з гэтым Польшча гатовая павялічыць колькасць вайскоўцаў у памежнай зоне ўтрая: з 6 да 17 тысяч.
Нагадаем: міграцыйны крызіс на мяжы Беларусі і Еўразвязу быў штучна справакаваны рэжымам Аляксандра Лукашэнкі ў 2021 годзе. Адпраўным пунктам крызісу стаўся скандал з пасадкаю самалёта «Ryanair» у траўні 2021 года, які пацягнуў за сабою маштабныя абмежавальныя захады з боку ЕЗ і ў тым ліку ўвядзенне сектаральных санкцыяў. У гэтай сітуацыі рэжым Лукашэнкі даў зразумець, што разглядае міграцыйнае пытанне ў якасці механізму шантажу Еўразвязу і помсты за санкцыі. Спачатку галоўным кірункам мігранцкіх плыняў была Літва, потым – Польшча.
Адзін з найбольш цяжкіх перыядаў прыпаў на вясну 2024 году, калі Польшча зноў пачала фіксаваць рост спробаў нелегальна мінуць мяжу з боку Беларусі. Пры гэтым павялічвалася не толькі колькасць мігрантаў, але і іхная агрэсіўнасць. У траўні і пачатку чэрвеня паведамлялася пра шэраг выпадкаў, калі польскія жаўнеры атрымлівалі сур’ёзныя раненні ў выніку нападу мігрантаў. 28 траўня сталася вядома, што мігрант, які спрабаваў нелегальна трапіць з Беларусі ў Польшчу, ударыў нажом польскага жаўнера. Раненне аказалася смяротным: 6 чэрвеня 21-гадовы Матэўш Сітэк памёр у шпіталі.
Глеб Нержын belsat.eu
