Варшаўскі мурал, прысвечаны беларускім палітвязням, пасля рэканструкцыі наведала кіраўніца Аб'яднанага пераходнага кабінета Святлана Ціханоўская.
Праца па рэканструкцыі мурала ў Варшаве была завершана ў пятніцу, 18 кастрычніка. Абнаўленне мурала звязана з тым, што яго папярэдняя версія страціла актуальнасць: на ёй быў выяўлены Алесь Бяляцкі, які на той момант быў на волі, аднак цяпер знаходзіцца за кратамі. Таксама цяпер на мурале, акрамя Бяляцкага, выяўленыя Андрэй Пачобут, Марыя Калеснікава і Марфа Рабкова.
Аўтарамі новага твора сталі мастакі Дарыюш Пачкоўскі і Магдалена Чыжыкевіч-Януш.
Абноўлены мурал агледзелі беларуская дэмакратычная лідарка Святлана Ціханоўская, прадстаўніца АПК па нацыянальным адраджэнні Аліна Коўшык і прэзідэнт Amnesty International Polska Міхал Курпінскі.
Святлана Ціханоўская зазначыла, што задача беларусаў - выратаваць палітвязняў. Таксама яна падзякавала Польшчы за прынцыповую пазіцыю адносна сітуацыі ў Беларусі.
«Гэты мурал вельмі важны не толькі для нас, але і для палякаў, бо на ім змешчаныя агульначалавечыя надпісы, якія дапамагаюць разумець, чаму зараз важна быць побач з беларусамі. Гэта добры напамін і пра польскую салідарнасць. І мы ў многім бяром прыклад з Польшчы ў змаганні супраць дыктатуры», – цытуе Святлану Ціханоўскую прэс-служба АПК.
Праект па абнаўленні мурала рэалізаваны дзякуючы сумесным намаганням прадстаўніцтва па нацыянальным адраджэнні Кабінета і Amnesty International Polska. У стварэнні ідэі мурала актыўны ўдзел прымала беларуская супольнасць. Ключавую ролю ў арганізацыі і фінансаванні праекта адыгралі ўлады Варшавы.
Глеб Нержын belsat.eu
