Міністр замежных справаў Францыі Жан-Наэль Баро падчас візіту ў Кіеў заявіў, што першыя самалёты «Mirage 2000» Украіна атрымае ўжо ў пачатку 2025 года.
«Наша дапамога праяўляецца ў канкрэтных прыкладах. Што тычыцца сферы абароны, мы даем Украіне абсталяванне і вайсковую тэхніку. Таксама Францыя - першая краіна, якая займаецца падрыхтоўкай цэлай брыгады, гэта брыгада Ганны Кіеўскай. Першыя самалёты «Mirage 2000» будуць прадастаўлены Украіне ў пачатку наступнага года», - цытуе Жана-Наэля Баро РБК-Украіна.
Міністр зазначыў, што Францыя будзе рыхтаваць пілотаў гэтых самалётаў.
Паводле RFI, Жан-Наэль Баро падчас візіту ў Кіеў таксама выказаўся ў падтрымку «плана перамогі», які нядаўна прэзентаваў прэзідэнт Уладзімір Зяленскі.
Упершыню пра планы перадаць Украіне знішчальнікі «Mirage 2000» у Парыжы заявілі ў чэрвені 2024 году. ЗСУ можа атрымаць 20 адзінак знішчальнікаў мадыфікацыі «Mirage 2000-5F».
«Mirage 2000» – французскі шматмэтавы знішчальнік чацвёртага пакалення, распрацаваны ў 1970-х гадах. Здольны несці ракеты SCALP («Storm Shadow») і кіраваныя авіябомбы. Асноўны баявы самалёт ВПС Францыі ў канцы XX – пачатку XXI стагоддзя. З 2000-х у французскай арміі яго пачаў замяняць больш сучасны знішчальнік «Rafale». «Mirage 2000» ёсць на ўзбраенні некалькіх краінаў Азіі, Еўропы і Лацінскай Амерыкі.
Глеб Нержын belsat.eu
