У Беларусі пашырашы спіс «экстрэмістаў». Туды дадалі яшчэ 21 чалавека і цяпер у спісе 4544 прозвішчы. А тым часам рэпрэсіі сталі распаўсюджвацца нават на праўладных актывістаў. Пра гэта і іншыя рэпрэсіі ў штодзённым аглядзе «Белсату».
У Гомелі асудзілі 76-гадовую пенсіянерку Ларысу Кулік нібыта за «абразу Лукашэнкі». Жанчына апынулася сярод 21 асобаў, якія папоўнілі спіс «экстрэмістаў».
Які менавіта тэрмін прызначылі жанчыне – невядома. У спісе МУС пазначана, што «судзімасць не пагашана».
Праўладнага блогера Яўгена Катлярова (псеўданім – Яўген Какойта) асудзілі за «дыскрэдытацыю Беларусі» на паўтара года калоніі агульнага рэжыму.
Праваабаронцы «Вясны» адзначаюць, што абвінавацілі яго па «палітычных» артыкулах: дыскрэдытацыя Рэспублікі Беларусь (арт. 369-1 КК) і абраза прадстаўніка ўлады (арт. 369 КК).
Прысуд вынес Геннадзь Калацэй.
Раней даносы Катлярова станавіліся падставай для абвінавачвання людзей па крымінальных і адміністрацыйных артыкулах, у тым ліку гомельскага праваабаронцы Леаніда Судаленкі.
У 2023 годзе Катляроў накіраваў увагу на законнасць дзеянняў мясцовых уладаў. Гэта прывяло да яго пошукаў міліцыяй і змяшчэння ў ізалятар часовага ўтрымання.
Яшчэ адзін выпадак з Гомеля – арышт прызыўніка, які хацеў служыць ва ўнутраных войсках. Сілавікам хлопец падаўся падазроным і яны зладзілі яму праверкі. Апынулася, што прызыўнік нібыта знаходзіцца ў «экстрэмісцкіх чатах».
,,«Разам з куратарамі аднадумцамі ў сетцы ён абмяркоўваў планы па дэстабілізацыі абстаноўкі ў краіне, але самае цікавае – прапаноўваў свае паслугі па ўкараненні ва ўнутраныя войскі. Зараджаны крот быў гатовы фатаграфаваць вайсковую тэхніку, узбраенне, спецсродкі і перадаваць аператыўныя звесткі аб службова-баявой дзейнасці войскаў», – заяўляе тэлеграм-канал унутраных войскаў МУС.
Сілавікі кажуць, што хлопцу пагражае крымінальная справа.
Сямейную пару затрымалі за ўдзел у пратэстах і падпіскі на «экстрэмістаў». На відэа сілавікоў мужчына кажа, што быў падпісаны на «дэструктыўныя» каналы, удзельнічаў у пратэстах, адпраўляў інфармацыю ў чат-боты каналаў «Чорная кніга Беларусі» і «Голас».
Жанчына кажа, што працуе ў айці-кампаніі, у пратэстах не ўдзельнічала, але падтрымлівала людзей з балкона. Таксама яна нібыта была падпісаная на «экстрэмісцкія» каналы і пісала ў іх «абразлівыя» каментары і рабіла рэпосты.
Студэнта менскага каледжа бізнесу і права затрымалі нібыта за «заклікі да беспарадкаў, забойстваў, пагрозаў учыніць страляніну ў школе, абразу ўладаў і распаўсюду нацызму». Таксама сілавікі сцвярджаюць, што хлопец трымаў сувязь з «тэрарыстамі-наймітамі і адміністраваў украінскі чат, у якім распальваў нянавісць па нацыянальнай прыкмеце».
У сацыяльных сетках затрыманы падпісаны як Улад Пятроў-Бронскі, ён быў анлайн раніцай 15 кастрычніка.
У Беларусі арыштавалі нерухомасць журналісткі Таццяны Каравянковай – траціну дзедаўскага дома. Арышт накладзены на падставе пастановы галоўнага следчага ўпраўлення цэнтральнага апарата Следчага камітэта ад 26 верасня. Прычына пераследу Таццяне пакуль невядомыя.
Арсен Рудэнка belsat.eu
