Восем расейскіх беспілотнікаў заляталі ў Беларусь уночы з 17 на 18 кастрычніка падчас атакі Украіны. Для супрацьдзеяння ім падымалі знішчальнік.
Як паведамляў «Беларускі Гаюн», спачатку два «шагэды» прайшлі праз гарадскі пасёлак Камарын у чарнобыльскую зону ва Украіне.
А 23:13 яшчэ адзін дрон зайшоў у ваколіцы Любеча і паляцеў на поўдзень ад Брагіну. Калі ён яшчэ быў на тэрыторыі Беларусі, з аэрадрому «Баранавічы» ўзнялі дзяжурны знішчальнік ВПС РБ.
Затым яшчэ адзін расейскі дрон рухаўся ў бок Беларусі блізка Любеча. А 00:29 два беспілотнікі зайшлі ў Беларусь з Чарнігаўскай вобласці, а 00:44 яшчэ два дроны — праз Камарын.
У ВПС Украіны заявілі раніцаю 18 кастрычніка, што з вечара 17 кастрычніка радыётэхнічныя войскі выявілі 135 варожых беспілотнікаў. Пры гэтым 80 БПЛА былі збітыя ў Адэскай, Сумскай, Чаркаскай, Кіеўскай, Жытомірскай, Кіраваградскай, Чарнігаўскай, Палтаўскай, Хмяльніцкай, Ровенскай, Харкаўскай, Херсонскай, Валынскай і Вінніцкай вобласцях.
Лакацыйна страчаныя 44 расейскія беспілотнікі, два паляцелі ў Беларусь, да дзесяці яшчэ застаюцца ў паветранай прасторы цэнтральных вобласцяў Украіны.
Гэта чарговы факт прылёту расейскага вайсковага дрона ў Беларусі. Напрыклад, у ноч на 5 верасня ў Гомельскі раён заляцелі прынамсі два расейскія ўдарныя беспілотнікі тыпу іранскіх «шагэдаў». Выглядае, што іх збіла беларуская супрацьпаветраная абарона. Гомельцы назіралі, як штосьці ў небе гарыць і падае.
А 3 кастрычніка расейскі дрон упаў у Калінкавічах. Гэты гук пачулі жыхары ўсяго райцэнтру і суседніх вёсак. Жанчыну, камера дому якой зафіксавала падзенне, затрымалі сілавікі.
Якуб Хруст belsat.eu
