Беларусі ўдалося захаваць месца ў міжнароднай футбольнай сям’і, зборная афіцыйна зацверджаная UEFA як удзельнік адборачнага турніру чэмпіянату свету. Расея зноў засталася па-за гульнёй, яе няма ў спісе ўдзельнікаў чэмпіянату.
Лёсаванне
На лёсаванне чэмпіянату свету паедзе афіцыйны прадстаўнік рэжыму Аляксандра Лукашэнкі. Гэта азначае, што нягледзячы на шматлікія заклікі выключыць футбольную зборную Беларусі з удзелу ў міжнародных турнірах, яна захавала месца ў іх і як мінімум да канца 2025 года забяспечыла сябе міжнародным календаром.
Лёсаванне адборачнага турніру чэмпіянату свету сярод еўрапейскіх камандаў пройдзе ў швейцарскім Цюрыху, 13 снежня туды будзе запрошаная афіцыйная дэлегацыя з Беларусі на чале з кіраўніком Беларускай федэрацыі футболу Мікалаем Шарснёвым.
Праўда, прымаць супернікаў у хатніх матчах ёй ізноў давядзецца за мяжой, на нейтральных палях і без гледачоў. Але да такога развіцця падзеяў беларускія футбалісты ўжо прызвычаіліся, і хутчэй за ўсё, як і апошнія два гады, хатнія матчы зборнай Беларусі пройдуць у Вугоршчыне.
Адборачны турнір
Падчас лёсавання 54 каманды будуць падзеленыя на 12 групаў з 4-5 зборных.
Еўропу ў фінальным турніры чэмпіянату свету рэпрэзентуюць 16 зборных. 12 пераможцаў групаў атрымаюць наўпроставыя пуцёўкі ў фінальную частку ЧС-2026. 12 камандаў, што зоймуць другія месцы ў сваіх групах, а таксама 4 найлепшыя ўдзельнікі групаў Лігі нацыяў – 2024/2025, якія трапяць ніжэй за другое месца ў групах адборачнага цыклу ЧС-2026, сфармуюць плэй-оф раўнд, і ў ім будуць разыграныя астатнія 4 пуцёўкі на мундыяль.
Што ж да фармату плэй-оф, то 16 яго ўдзельнікаў будуць разбітыя на 4 шляхі па 4 каманды. У кожным са шляхоў будуць праведзеныя аднамачтавыя паўфіналы і фінал. Пераможцы кожнага з чатырох фіналаў плей-оф выйдуць на ЧС-2026.
,,Тэарэтычна зборная Беларусі мае шанцы прабіцца на чэмпіянат свету праз Лігу нацыяў, цяпер яна займае там другое месца ў сваёй групе. Але і для гэтага неабходна прынамсі перамагчы ў лістападзе на выездзе зборныя Паўночнай Ірландыі і Балгарыі. Але ў любым выпадку налета зборную Беларусі чакае мінімум шэсць матчаў найвышэйшага ўзроўню.
Фінальная частка ЧС-2026 пройдзе з 11 чэрвеня да 19 ліпеня 2026 года на футбольных палях ЗША, Канады і Мексікі. Упершыню ў турніры выступяць 48 зборных.
Патэнцыйныя супернікі
Усяго для лёсавання сфармавана пяць групаў, Беларусь апынулася ў чацвёртай. Гэта азначае, што зборная Беларусі дакладна не згуляе з Літвой і Эстоніяй, якія адмаўляюцца гуляць з беларускай камандай, пакуль у Беларусі дзее рэжым Лукашэнкі.
У першым кошыку – выключна топы еўрапейскага футболу. Напрыклад, чэмпіёны Еўропы іспанцы, англічане, італьянцы, немцы. З кімсьці з гэтых элітных зборных і давядзецца згуляць зборнай Беларусі.
У другім кошыку апынулася зборная Украіны, але арганізатары лёсавання плануюць развесці Беларусь і Украіну ў розныя групы. Яшчэ Беларусі можа дастацца Польшча, футбольныя ўлады гэтай краіны пакуль не адмаўляліся гуляць з рэжымнымі камандамі. Так, на 7 лістапада ў Варшаве запланаваны матч Лігі канферэнцыі паміж «Легіяй» і менскім «Дынама».
Паводле апошняга рэйтынгу FIFA Беларусь займае 97-е месца ў свеце. У сваёй гісторыі зборная Беларусі пакуль яшчэ не адбіралася ў фінальныя турніры чэмпіянатаў свету і Еўропы.
Алесь Ляўчук belsat.eu
