17 кастрычніка міністр унутраных справаў і адміністрацыі Польшчы Томаш Семоняк заявіў падчас прэс-канферэнцыі ў Няміраве пра намер стварыць спецыяльнае падраздзяленне ў структуры Памежнай аховы Польшчы.
Паводле словаў Семоняка, новае спецпадраздзяленне будзе займацца «фізічнай, непасрэднай аховай межаў», паведамляе tvp.info.
Як падкрэсліў міністр, Польшча мусіць «аднавіць кантроль над тым, хто заязджае і выязджае з краіны».
«Кожны дзень мы сутыкаемся са спробамі [нелегальнага] мінання мяжы, – сказаў ён. – Верасень быў найгоршым месяцам [у гэтым сэнсе]. Гэтая тэндэнцыя пагоршылася. Аднак мы лічым, што інвестыцыі, укладзеныя ў загароду [на мяжы з Беларуссю], прыносяць вынікі».
Нагадаем, 15 кастрычніка прэм’ер-міністр Польшчы Дональд Туск паведаміў, што ў Польшчы прынятая комплексная міграцыйная стратэгія «Вярніце сабе кантроль. Гарантаваць бяспеку». Раней ён заяўляў, што гэтая стратэгія прадугледжвае «часовае тэрытарыяльнае прыпыненне права на прытулак».
16 кастрычніка Туск заявіў, што права на прытулак мусіць давацца толькі тым людзям, якія «сапраўды зазнаюць пераслед у сваёй краіне, і вяртанне туды пагражае іхнаму жыццю».
Ён падкрэсліў, што прыпыненне прыёму заяваў на прытулак будзе тычыцца «асобаў, якія незаконна мінаюць польскую мяжу пры падтрыманні службаў Беларусі і Расеі».
Таксама нагадаем, што ў той жа дзень, рэагуючы на крытыку з боку прэзідэнта Польшчы Анджэя Дуды, Туск падкрэсліў, што «не было ніводнага выпадку, каб беларускі апазіцыянер спрабаваў нелегальна перайсці польска-беларускую мяжу ў складзе групаў, арганізаваных Лукашэнкам».
На сённяшняй прэс-канферэнцыі прэм’ер-міністр Польшчы падкрэсліў, што пастановы ўраду скіраваныя не толькі на абарону мяжы з Беларуссю, але і на перадухіленне гібелі людзей, як мігрантаў, так і польскіх жаўнераў ды памежнікаў.
Надзея Вольная belsat.eu
