Паводле Праваабарончага цэнтру «Вясна», цягам верасня паводле палітычна матываваных крымінальнах справаў былі асуджаныя не менш за 170 чалавек, з іх 46 жанчыны і 124 мужчыны.
Паводле звестак праваабаронцаў, найбольш палітычных выракаў вынеслі ў Менску ‒ 61. На Берасцейшчыне рэпрэсавалі 44 чалавек, на Гомельшчыне ‒ 20, у Менскай вобласці ‒ 25, у Віцебскай ‒ 9, у Магілёўскай ‒ 8, на Гарадзеншчыне ‒ тры чалавекі.
Асноўную долю ў структуры крымінальнага пераследу з палітычных матываў складаюць крымінальныя справы паводле 342 артыкулу КК. 46 % асобаў, супраць якіх былі ўжытыя рэпрэсіі ў верасні, мелі ў абвінавачванні гэты артыкул.
Пры гэтым практыка выкарыстання гэтага артыкулу мае рэгіянальную спецыфіку: у Берасцейскай вобласці паводле артыкулу за ўдзел у стыхійных мірных сходах у жніўні і верасні 2020 года ў Берасці, Берасцейскім раёне і Бярозе судзяць пераважна групы асобаў, ставячы ім адны і тыя ж эпізоды. Пры гэтым ужо ў Пінску практыка пайшла ў бок пераследу грамадзянаў па адным чалавеку – толькі за верасень у гэтым горадзе былі засуджаныя сямёра.
Праваабаронцы зазначаюць, што ў верасні працягвалася практыка пераследу сем'яў або групаў сваякоў паводле артыкулу 342 Крымінальнага кодэксу. У Дзяржынску ў межах судовага разбору слухаліся справы ў дачыненні Ірыны і Андрэя Шайкоўскіх, а таксама Аляксандра і Таццяны Грышкевічаў. У судзе Маскоўскага раёну Менску слухалася справа Аляксея і Людмілы Паўловічаў. У судзе Ленінскага раёну Берасці былі асуджаныя муж і жонка да двух і аднаго года пазбаўлення волі адпаведна ‒ Генадзь і Ганна Васілюкі. Суд Ленінскага раёну Магілёва засудзіў да двух гадоў абмежавання волі без скіравання ў папраўчую ўстанову Льва Іўчына, бацьку якога, Валерыя Іўчына, тры месяцы раней гэты ж суд засудзіў да двух з паловаю гадоў абмежавання волі са скіраваннем у ПУАТ.
Агулам «Вясна» фіксуе тэндэнцыю паўторнага і наступнага асуджэння грамадзянаў, раней рэпрэсаваных паводле палітычных матываў: у верасні не менш за 12 асобаў засудзілі па другім коле.
Глеб Нержын belsat.eu
