Журналіст-фрылансер Даніла Палянскі быў затрыманы, хутчэй за ўсё, 19 верасня 2024 года пасля вяртання на радзіму з Расеі, паведамляе Беларуская асацыяцыя журналістаў.
Дакладная дата невядомая, але менавіта 19 верасня з журналістам знікла сувязь.
На пачатку верасня Даніла Палянскі ездзіў у Расею да сваякоў. У дарозе здарыўся інцыдэнт з расейскімі сілавікамі. Аўтамабіль берасцейца спынілі супрацоўнікі ФСБ і пасля абвінавацілі журналіста ў адміністратыўным парушэнні за непадпарадкаванне: ён нібыта адмовіўся паказваць дакументы.
,,«Даніла казаў, што на той момант ягоны пашпарт быў у руках расейскага сілавіка, – распавядае адзін са знаёмых Палянскага. – Пазней, калі ён вярнуўся ў Берасце, яго затрымалі супрацоўнікі КДБ».
Днямі сталася вядома пра распачатую супраць журналіста крымінальную справу. Данілу Палянскаму інкрымінуюць артыкул 356 Крымінальнага кодэксу РБ («Здрада дзяржаве»). Мужчыну змясцілі пад варту ў СІЗА.
Данілу Палянскаму 53 гады. Некалі ён супрацоўнічаў як відэаператар з дзяржаўнымі і камерцыйнымі тэлеканаламі, а таксама з незалежнымі рэгіянальнымі сайтамі. У апошнія гады быў вядомы ў Берасці як валанцёр пошукава-выратавальнага атраду «Анёл».
Паводле Беларускай асацыяцыі журналістаў, станам на 16 кастрычніка 2024 года, у Беларусі за кратамі застаюцца 33 работнікі медыяў.
Марыя Міхалевіч belsat.eu
