Інтэрнэт у Беларусі амаль такі ж свабодны, як на Кубе, лічаць праваабаронцы «Freedom House». У рэйтынгу свабоды інтэрнэту Беларусь страціла яшчэ тры балы – а іх і так не было шмат.
На абноўленай мапе «Freedom House» Беларусь засталася ў групе краінаў з несвабодным інтэрнэтам, але страціла тры пункты рэйтынгу: летась мела 25 са 100, цяпер – 22. Найбольш за год пагоршылася сітуацыя ў Кыргызстане, які, праўда, застаецца часткова свабодным з 48 баламі. Суседняя з Беларуссю Украіна таксама адносіцца да часткова свабодных у інтэрнэце з 59 баламі са 100 – столькі ж у Анголы.
Беларускія 22 балы – гэта менш, чым у Венесуэле (30), Пакістане (27) ці Саудаўскай Аравіі (25), але больш, чым у Кітаі (9), М’янме (9), Іране (12), крыху лепш за Расею (20) і Кубу (20). Звестак пра найбольш несвабодныя ў свеце Паўночную Карэю, Туркменістан і Афганістан не сабралі.
У дакладзе пра інтэрнэт у Беларусі згадваюць часовае блакаванне YouТube падчас навагодняга звароту Святланы Ціханоўскай, рост колькасці крымінальных справаў за «экстрэмізм» у інтэрнэце і пераслед за онлайн-ахвяраванні, праверкі тэлефонаў на мяжы. З 2020 года ў няволі ў Беларусі памерлі шэсць палітвязняў, а чатыры з іх, як адзначае «Freedom House», былі зняволеныя ў тым ліку за онлайн-актыўнасць.
Пры тым у Беларусі інтэрнэт даволі даступны з фінансавага і тэхналагічнага гледзішча – коштам гэтага Беларусь не на самых апошніх пазіцыях.
Алесь Наваборскі belsat.eu
