Поўнамаштабная вайна ва Украіне трывае 966 дзён. Расея нанесла незвычайна масаваны ўдар беспілотнікамі і наступае на Данбасе. «Белсат» расказвае, што вядома на раніцу 16 кастрычніка.
Паводле ранішняй зводкі Генеральнага штабу Збройных сілаў Украіны, за мінулы дзень зафіксавалі 171 баявое сутыкненне – гэта даволі высокая інтэнсіўнасць баёў, але яшчэ не рэкордная. Днём раней было 198 баёў. Найбольш інтэнсіўныя сутыкненні – на курахаўскім, купянскім і пакроўскім напрамках, баі таксама трываюць на харкаўскім, ліманскім, краматорскім, тарэцкім, врэменеўскім, арэхаўскім і прыдняпроўскім напрамках.
За мінулы дзень, як падлічылі ЗСУ, Расея нанесла па Украіне 5 ракетных удараў 13 ракетамі, 65 авіяўдараў са 130 кіраванымі авіябомбамі, звыш 4500 абстрэлаў. Трываюць і баі ў Курскай вобласці Расеі, дзе ЗСУ налічылі з боку Узброеных сілаў Расеі 16 авіяўдараў 23 кіраванымі бомбамі і 191 артылерыйскі абстрэл.
Паводле падлікаў украінскага боку, Расея за дзень страціла 1450 чалавек, 9 танкаў, 30 бронемашынаў, 29 артылерыйскіх сістэмаў, 78 машынаў і іншую тэхніку, а агулам з пачатку поўнамаштабнага ўварвання – звыш 672 тысячы чалавек і амаль роўна 9 тысяч танкаў.
У ноч на 16 кастрычніка расейскія войскі нанеслі асабліва масаваны ўдар беспілотнікамі: Паветраныя сілы Украіны налічылі 136 дронаў, а таксама адну ракету «X–59» і адну з «С-300/400». Станам на 7 раніцы паводле ўкраінскага часу збіць удалося 51 дрон, яшчэ 60 былі «лакацыйна страчаныя» ў выніку радыёэлектроннай барацьбы, два вярнуліся на тэрыторыю Расеі, але яшчэ два дзясяткі заставаліся ў паветры. Пагроза ўдараў беспілотнікаў захоўвалася на Кіеўшчыне, Кіраваградшчыне, у Хмяльніцкай і Днепрапятроўскай абласцях.
Вядома пра параненых, але аб забітых ад начнога абстрэлу не паведамлялі – толькі вечарам мінулага дня ў выніку абстрэлу загінуў мірны жыхар у вёсцы Грушкаўка Купянскага раёну. У Херсоне і на Мікалаеўшчыне знікла святло.
Амерыканскі Інстытут вывучэння вайны (ISW) адзначае, што расейскія войскі прасоўваюцца ў Курскай вобласці, пад Купянскам, Тарэцкам і Пакроўскам, нягледзячы на страту (забарону сваёй жа ўладай) важнага сродку камунікацыі, праграмы «Discord». З Купянску і трох прылеглых грамадаў абвясцілі эвакуацыю. Маніторынгавы праект «DeepState» паведамляе аб акупацыі расейскімі войскамі сяла Астроўскае – выглядае, што расейскія войскі спрабуюць атачыць Курахаўку.
Таксама ISW звярнуў увагу на стратэгічнае партнёрства Расеі і Паўночнай Карэі: гэтае партнёрства выкарыстоўваюць для аховы мяжы, каб не абвяшчаць новую хвалю мабілізацыі. Сцвярджаецца, што расейская 11-я паветрана-дэсантная брыгада фармуе батальён з 3000 вайскоўцаў з Паўночнай Карэі, які можа выкарыстоўваць у Курскай вобласці. Яшчэ да пачатку баявых дзеянняў прынамсі 18 паўночнакарэйскіх вайскоўцаў дэзертавалі, заяўляе крыніца ва ўкраінскай выведцы (праўда, праблема дэзерцірства ёсць і ва ўкраінскім войску).
Прэзідэнт Украіны Уладзімір Зяленскі 14 кастрычніка казаў, што Расея практычна ўключыла Паўночную Карэю ў вайну. Дарадца Белага дому ў камунікацыях аб нацыянальнай бяспецы Джон Кірбі назваў удзел паўночнакарэйскіх вайскоўцаў у вайне «новым узроўнем адчаю» Уладзіміра Пуціна. Тымі жа словамі – «новым узроўнем адчаю» – гэта апісаў прадстаўнік Рады нацыянальнай бяспекі ЗША Шон Савэт. Ды агулам ЗША ўсхваляваныя актыўнасцю Паўночнай Карэі ў стасунках з Расеяй.
Злучаныя Штаты тым часам патлумачылі, што не будуць збіваць ракеты над Украінай, як робяць тое над Ізраілем, бо гэта «розныя войны», Таксама ЗША не размесцяць блізу Украіны сістэму перахопу сярэдняй далёкасці THAAD, бо для супрацьстаяння расейскім атакам патрэбныя іншыя сістэмы. Пра гэта расказала на прэс-канферэнцыі намесніца прэс-сакратаркі Пэнгатгону, ды журналісты з ёй спрачаліся. Кіраўнік Пентагону на гэтым тыдні мае правесці ў Еўропе шэраг сустрэчаў пра далейшую падтрымку Украіны. І ЗША самі шукаюць новыя магчымасці падтрымкі Украіны: так, амерыканскія вайскоўцы арганізавалі «віртуальную місію» дапамогі ўкраінскім вайскоўцам у рамонце тэхнікі – ад гаўбіц да танкаў.
Алесь Наваборскі belsat.eu
