З 15 кастрычніка запрацавалі новыя санкцыі лукашэнкаўскага рэжыму ў дачыненні «несяброўскіх» краінаў. Іх ахвярамі, праўда, сталіся грамадзяне Беларусі.
Згодна з пастановай, якую падпісаў прэм’ер-міністр Раман Галоўчанка, у спіс тавараў, забароненых для ўвозу з Польшчы, Літвы, Латвіі, Эстоніі і Чэхіі, а таксама для рэалізацыі на тэрыторыі Беларусі, дададзеныя:
- торбы і валізкі;
- шпалеры;
- кафля керамічная;
- санітарна-тэхнічныя вырабы;
- халадзільнікі, лядоўні ды іншае халадзільнае або маразільнае абсталяванне;
- пральныя машыны;
- падгузнікі і пялюшкі.
Агулам жа з «несяброўскіх краінаў» (а гэта Еўразвяз, Злучанае Каралеўства, Злучаныя Штаты, Канада і іншыя) дадаткова забаранілі ўвозіць:
- поліэтылен высокага ціску;
- шынную прадукцыю,
- пліты OSB (з драўнянай стружкі);
- фанеру;
- вырабы сталярныя і цяслярскія;
- паперу і вырабы санітарна-гігіенічныя;
- паперу і кардон, у тым ліку гафраваныя;
- рыззё;
- шкловалакно і шклавату.
Абмежаванні не распаўсюджваюцца на тавары, якія перавозяцца для асабістага карыстання.
Гэтыя забароны ‒ адказ на санкцыі, якія Еўразвяз увёў адносна Беларусі гэтым летам. Чаму на санкцыі трэба адказваць абмежаваннямі на ўвоз тавараў, якімі карыстаюцца беларусы, Саўмін не паведамляе.
Новыя санкцыі Еўразвязу супраць Беларусі за падтрыманне расейскай вайны ва Украіне запрацавалі з 2 кастрычніка. Яны закрываюць шчыліну, што дапамагала абыходзіць аналагічныя захады супраць РФ, і датычаць гандлю, сферы паслуг і транспарту, а таксама барацьбы з абыходам санкцыяў. У прыватнасці, прадоўжаная забарона на экспарт тавараў і тэхналогіяў падвойнога прызначэння і ўведзеныя дадатковыя абмежаванні на экспарт тавараў, якія спрыяюць умацаванню прамысловага патэнцыялу Беларусі, экспарт тавараў і тэхналогіяў для марскога карабельства, а таксама прадметаў раскошы.
Акрамя таго, забаронены імпарт з Беларусі золата, алмазаў, гелію, вугалю, сырой нафты, прадукцыі сэканд-хэнду. Забараняецца таксама надаваць бухгалтарскія, аўдытарскія, кансалтынгавыя, архітэктурныя ды інжынерныя паслугі ўладам і дзяржаўным установам Беларусі. Забароненыя і паслугі ў сферы IT, юрыспрудэнцыі, рэкламы і сацыялагічных даследаванняў. Адначасова пашыраная забарона на перавоз грузаў аўтамабілямі з беларускімі нумарамі.
Якуб Хруст belsat.eu
