Мінімум 26 былым палітычным вязням у кастрычніку плануюць замяніць «хатнюю хімію» на калонію. Некаторым ‒ завочна, паведамляе праваабарончы цэнтр «Вясна».
Паводле звестак праваабаронцаў, у кастрычніку ў Беларусі адбыліся ці яшчэ адбудуцца не менш як 25 судоў для замены былым палітвязням абмежавання волі без накіравання ў ПУАТ («хатняй хіміі») на пазбаўленне волі. У дачыненні тых, хто пасля вызвалення з СІЗА пакінуў Беларусь, суды праходзяць завочна.
Напрыклад, 14 кастрычніка ў Менску праходзілі восем судоў для замены «хатняй хіміі» на калонію. Рашэнне прымалі ў тым ліку ў справе былой палітзняволенай Вольгі Рытус.
А ў судзе Савецкага раёну Менску 11 кастрычніка замянілі пакаранне даследніцы беларускіх вязняў ГУЛАГу Валерыі Чарнаморцавай.
Тых былых палітвязняў, якія застаюцца ў Беларусі, пасля суда змяшчаюць пад варту і пераводзяць у калоніі.
У верасні ўлады збіраліся змяніць абмежаванне волі на ўтрыманне ў калоніі былой палітзняволенай і экс-прадстаўніцы ў сферы сацыяльнай палітыкі Аб’яднанага пераходнага кабінету Вользе Гарбуновай, якая пакінула Беларусь.
Якуб Хруст belsat.eu
