«Белсат» аналізуе вынікі чарговага тыдня поўнамаштабнай вайны, распачатай Расеяй ва Украіне. Пра становішча на фронце станам на 14 кастрычніка чытайце ў нашым матэрыяле.
Прарыў абароны ЗСУ на Куршчыне
На мінулым тыдні ўзнавіліся маштабныя баявыя дзеянні на поўдні Курскай вобласці РФ. 10 кастрычніка расейскія вайскоўцы перайшлі ў наступ адразу на некалькіх участках фронту ў Коранеўскім і Суджанскім раёнах, у выніку чаго ім удалося прынамсі часткова прарваць абарону праціўніка.
Так, у Коранеўскім раёне пад кантроль расейцаў перайшоў значны ўчастак тэрыторыі на ўсходзе і паўднёвым усходзе ад аднайменнага населенага пункту, у выніку чаго быў ліквідаваны выступ паміж сёламі Крамяное і Любімаўка.
Праўкраінскія крыніцы паведамляюць, што на паўночным усходзе ад Любімаўкі ў бой уступілі артылерысты і аператары БпЛА, што пацвярджае імклівае прасоўванне расейцаў.
У суседнім Суджанскім раёне асноўныя намаганні расейцаў былі засяроджаныя на ўчастку фронту з поўначы ад раённага цэнтру, дзе ім таксама ўдалося лакальна прасунуцца.
Ужо на наступны дзень Узброеныя сілы РФ перайшлі ў наступ і на тэрыторыі Глушкоўскага раёну Харкаўскай вобласці: тут ім удалося адкінуць праціўніка каля сяла Вясёлае і выбіць з Мядзьвежага. Такім чынам, украінскія вайскоўцы былі амаль цалкам выціснутыя з тэрыторыі раёну. Нагадаем, раней адсюль ЗСУ намагаліся прабіцца да ракі Сейм, каб у далейшым выйсці з тылу да групоўкі праціўніка.
У Коранеўскім раёне расейцы развілі поспех на поўначы ад Любімаўкі і занялі населены пункт Зялёны Шлях. Адначасова з гэтым адбыўся прарыў на поўдні ад Любімаўкі, у выніку чаго войскі РФ прарваліся да пасёлкаў Пакроўскі і Ніжні Клін і занялі іх. Такім чынам, у паўатачэнні аказаліся вайскоўцы ЗСУ ў Любімаўцы і прылеглым сяла Тоўсты Луг.
У Суджанскім раёне Узброеным сілам РФ удалося прарвацца на некалькіх участках фронту на паўднёвым усходзе ад раённага цэнтру.
Галоўнакамандуючы ЗСУ Аляксандр Сырскі заявіў, што перад наступам у Курскай вобласці расейцы перакінулі каля 50 тысяч вайскоўцаў.
Аналітыкі праекту Deepstate мяркуюць, што поспехі расейцаў на Куршчыне у значнай меры звязаныя з кепскім узаемадзеяннем паміж падраздзяленнямі ЗСУ, чым у чарговы раз карыстаюцца расейцы, прарываючыся на іх стыках.
У далейшым існуе высокая верагоднасць таго, што частка байцоў Збройных сілаў, у прыватнасці, у ваколіцах Любімаўкі, можа апынуцца ў поўным атачэнні.
Паступовы, але перспектыўны рух расейцаў на Данбасе
У Данецкай вобласці ініцыятыва цалкам застаецца за Узброенымі сіламі РФ, якія ціснуць амаль па ўсёй лініі сутыкнення, хоць і з рознай інтэнсіўнасцю.
Так, на тарэцкім кірунку яны паступова прасоўваюцца на тэрыторыі аднайменнай агламерацыі. Аднак, гэты рух застаецца адносна павольным, паколькі ЗСУ пакуль удаецца ўтрымліваць флангі і пазбягаць атачэння, а цяжкія гарадскія баі ў шчыльнай забудове не спрыяюць хуткім поспехам расейцаў.
Тым часам на суседнім пакроўскім кірунку войскі РФ паступова набліжаюцца да чарговага буйнога населенага пункту, городу Мірнаград: тут, на першы погляд, у расейцаў назіраецца пэўны спад актыўнасці, аднак звязаны ён выключна з падыходам да падрыхтаваных абарончых збудаванняў ЗСУ, якія цяпер войскі РФ месцамі намагаюцца абысці. Агулам, асноўная тактыка расейцаў па-ранейшаму заключаецца ў спробах прарыву на самых слабых участках украінцаў, і выніку чаго часцяком ім удаецца наўпрост абыходзіць добраўмацаваныя пазіцыі праціўніка. У іншых выпадках, калі гэта не ўдаецца, поспеху расейцаў спрыяе істотная перавага ў артылерыі і авіяцыі, з дапамогай якіх руйнуюцца фактычна любыя пазіцыі.
Далей на поўдзень па фронце Узброеныя сілы РФ развіваюць поспех на стыку пакроўскага і курахаўскага кірункаў. На першым ім удалося прасунуцца ад сяла Цукурына да Новаселідаўкі (Нововселидівка), у выніку чаго з’явілася пагроза выхаду ў тыл і далейшым атачэннем вайскоўцаў ЗСУ, якія трымаюць абарону на ўчастку з усходу ў ваколіцах гораду Гарняк пасёлку Курахаўка.
Адначасова з гэтым ідзе рух расейцаў на курахаўскім кірунку, дзе яны ўжо занялі населены пункт Астраўское, і цяпер, імаверна будуць намагацца прасунуцца з поўначы ад ракі Воўча. Такімі дзеяннямі расейцы змогуць абысці падрыхтаваныя пазіцыі ЗСУ на ўсходзе і поўдні ад Курахава, а таксама пазбегнуць цяжкіх гарадскіх баёў, у прыватнасці, у прамысловай зоне населенага пункту.
Узрастанне актыўнасці на поўдні
На паўднёвым фронце войскі РФ паступова развіваюць поспех у ваколіцах раней занятага гораду Вуглядар. Акрамя гэтага варта звярнуць увагу на заняцце расейцамі сяла Залатая Ніва, што ўскосна ўказвае на жаданне прасунуцца на захад у бок урэмаўскага кірунку (на мяжы Данецкай і Запарожскай вобласцяў). Там, у сваю чаргу, УС РФ таксама маюць поспехі, у прыватнасці, пад іхны кантроль перайшоў населены пункт Леваднае.
У Цэнтральнай частцы Запарожскай вобласцяў пасля доўгага перапынку ўзнавіліся баі ў ваколіцах былога берагу Кахоўскага вадасховішча: прарасейскія крыніцы пішуць, што войскам РФ удалося прасунуцца ў сяле Камянское (Кам’янське).
Між тым у Deepstate пішуць, што праціўнік дзейнічаў сіламі дыверсійна-выведнай групы, якая неўзабаве была ліквідаваная. Існуе верагоднасць, што актывізацыя расейцаў на дадзеным участку фронту з'яуляецца спробай зрыву магчымай аперацыі ЗСУ ў ваколіцах гораду Энергадар.
На іншых участках фронту адзначаюцца лакальныя пазіцыйныя баі, а таксама артылерыйскія абстрэлы ўздоўж лініі сутыкнення.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Наталля Кулыгіна belsat.eu
