Праваабаронцы даведаліся, што апошнімі днямі ў Рагачове актыўна правяраюць тэлефоны ў вучняў і настаўнікаў.
Міліцыянты масава «адпрацоўваюць» настаўнікаў і вучняў на прадмет наяўнасці ў іх «экстрэмісцкіх» падпісак і перапісак з прадстаўнікамі «экстрэмісцкіх» матэрыялаў, паведамляе «Гомельская Вясна».
Магчыма, правяранне звязанае са з’яўленнем у медыях інфармацыі пра звальненне дырэктара рагачоўскай школы № 4 Аляксандра Лейкіна і суд над ім паводле адміністратыўнай справы за «распаўсюд экстрэмізму».
«Імаверна, міліцыянты шукаюць крыніцу праваабаронцаў, мяркуючы, што гэтая інфармацыя магла быць вядомая толькі людзям, якія непасрэдна звязаныя са сферай адукацыі», – піша «Гомельская Вясна».
Інфармацыя пра звальненне і суд над Аляксандрам Лейкіным з’явілася 10 кастрычніка. Пераслед дырэктара школы № 4 звязваюць з тым, што ён ставіў упадабанні пад нейкімі допісамі ў сацсетках і такім чынам распаўсюджваў інфармацыю, што ўтрымлівалася ў тых допісах.
Аляксандр Лейкін вядомы ў Рагачове не толькі як шматгадовы кіраўнік адукацыйнай установы, але і як краязнаўца. Мясцовая дзяржаўная газета неаднаразова друкавала ягоныя краязнаўчыя матэрыялы пра гісторыю Рагачоўшчыны.
Раман Шавель belsat.eu
