Дачка расейскага апазіцыянера Аляксея Навальнага, загінулага ў турме, ужо некалькі месяцаў працуе на выбарчы штаб кандыдаткі на пасаду прэзідэнта Злучаных Штатаў Камалы Гэрыс.
Пра гэта Дар’я Навальная паведаміла ў сваім асабістым блогу ў сацыяльнай сетцы LinkedIn.
У камандзе кандыдаткі ад Дэмакратычнай партыі Дар’я Навальная, хутчэй за ўсё, займаецца кантактамі з выбарнікамі, сувязямі з грамадскасцю і менеджарскаю працаю.
У красавіку 2024 года Камала Гэрыс напісала артыкул пра жонку Аляксея – Юлію Навальную. Неўзабаве пасля смерці палітыка з Юліяй і Дар’яй сустрэўся прэзідэнт Злучаных Штатаў Джо Байдэн.
Пра смерць Аляксея Навальнага стала вядома 16 лютага 2024 года. Ён памёр, правёўшы ў зняволенні 295 дзён, 27-ы раз пабываўшы ў ШІЗА. Толькі праз 10 дзён, пасля доўгіх адмоваў, цела Навальнага аддалі ягонай маці. У 2020-м палітык трапіў у рэанімацыю. Палітык і ягоныя паплечнікі казалі, што яго спрабавалі атруціць прадстаўнікі расейскіх уладаў.
Афіцыйнае правяранне па факце смерці апазіцыйнага палітыка не знайшло ніякіх парушэнняў, а прычынаю смерці назвалі комплекс праблемаў са здароўем. Пра адмову распачынаць крымінальную справу гаворыцца ў пастанове за 26 ліпеня.
Раман Шавель belsat.eu
