Італія змяніла патрабаванні да дакументаў для атрымання шэнгенскай візы, паведамляе амбасада Італіі ў Менску. Гэта павінна палегчыць жыццё беларусам, якія разлічваюць на візу.
Амбасада нагадвае, што дакументы на атрыманне візы прымаюцца толькі ў папяровым выглядзе (не па электроннай пошце і не ў лічбавым фармаце).
З 11 кастрычніка пры падачы на візу не трэба прад'яўляць наступныя дакументы:
1. Фінансавыя сродкі для непаўналетніх, якія вандруюць з бацькам, які выступае спонсарам іх паездкі. Трэба толькі спонсарскі ліст, падпісаны бацькамі, якія бяруць на сябе выдаткі па паездцы.
Аналагічна не патрэбныя фінансавыя сродкі для мужа/жонкі, які вандруюць з мужам/жонкай-спонсарам. Неабходна толькі спонсарскі ліст. Дадзеная ўмова дастасавальная толькі ў выпадку зарэгістраванага шлюбу і не распаўсюджваецца на пары, якія знаходзяцца ў неафіцыйным саюзе, у тым ліку сумесна пражываюць доўгі час.
Спонсарскі ліст можна напісаць ад рукі непасрэдна пры падачы дакументаў на візу.
2. Квіткі (пры паездцы на аўтобусе) або пасведчанне кіроўцы/дакументы на аўтамабіль (пры паездцы на аўтамабілі), якія пацвярджаюць праезд з Менска ў бліжэйшы аэрапорт вылету.
3. Пацверджанне месца пражывання ў транзітных краінах.
4. Электронны ключ індывідуальнага прадпрымальніка (досыць першай старонкі).
5. Дакументы, якія пацвярджаюць права ўласнасці на нерухомасць / зямельныя ўчасткі ў Беларусі.
Арсен Рудэнка belsat.eu
