У расейскім палоне пры нявысветленых абставінах памерла ўкраінская журналістка Вікторыя Рошчына. Чакалася, што найбліжэйшым часам яе абмяняюць.
Інфармацыю пра гібель журналісткі Вікторыі Рошчынай пацвердзіў кіраўнік прэс-службы каардынацыйнага штабу Пятро Яцэнка. Абставіны смерці цяпер высвятляюцца.
«Я думаю, што ў любым выпадку пра абставіны мы даведаемся. Таксама, калі ёсць вінаватыя ў гэтым, тыя, хто прычыніўся да гэтай смерці або гібелі, то яны абавязкова будуць пакараныя. Таму што такія злачынствы не маюць тэрміну даўніны», – заявіў ён у размове з «Укрінформ».
Прадстаўнік ГУР Андрэй Юсаў у каментары «Суспільнаму» паведаміў, што Рошчына мусіла быць уключаная ў адзін з найбліжэйшых абменаў палоннымі. Яе павінны былі этапаваць з Таганрогу ў турму «Лефортава» ў Маскве, каб падрыхтаваць вяртанне ва Украіну.
«Найбліжэйшым часам яна павінна была быць удома, для гэтага было зробленае ўсё неабходнае», – паведаміў ён.
Вікторыя Рошчына супрацоўнічала з «Радіо Свобода», «Українською правдою», «Hromadske», «Українським радіо», «UA:Перший» і «Цензор.нет». Яна знікла 3 жніўня 2023 года на акупаванай Расеяй тэрыторыі, куды паехала рабіць рэпартаж. У траўні 2024 года ўлады Расеі ўпершыню прызналі, што журналістка была арыштаваная.
Глеб Нержын belsat.eu
