У Беларусі ўводзіцца ліцэнзаванне экспарту садавінагароднінай прадукцыі. Робіцца гэта, каб выключыць некантраляваны яе вываз, заявіў міністр антыманапольнага рэгулявання і гандлю Аляксей Багданаў.
«Прапрацоўваецца пытанне ўвядзення ліцэнзавання на вываз, на экспарт капусты, цыбулі і яблыкаў. З чым гэта звязана? Прагназуецца, што гэтага тавару можа не хапіць да канца міжсезоннага перыяду, бо сёння ёсць павышаны попыт на экспартным напрамку, у Расейскай Федэрацыі. І цэны там у пэўнай ступені вышэйшыя, чым тут, на ўнутраным рынку», — расказаў міністр, перадае БелТА.
Таму, заявіў ён, «каб не было некантраляванага вывазу і быў забяспечаны ўнутраны рынак перадусім, плануецца ўвядзенне механізма ліцэнзавання».
Паводле Аляксея Багданава, гэта зробіць экспарт кіраваным і захавае неабходны аб’ём для ўнутранага рынку. На экспарт жа пойдзе толькі лішак.
Адзначым, што ў верасні Аляксандр Лукашэнка наадварот даручыў не толькі забяспечыць айчынны рынак беларускімі яблыкамі, але і пачаць іх экспартаваць на расейскі рынак. «Санкцыі — час магчымасцяў», — канстатаваў палітык.
Якуб Хруст belsat.eu
