9 кастрычніка ўдарная група групоўкі сілаў і сродкаў Ваенна-Марскіх сілаў Збройных сілаў Украіны ва ўзаемадзеянні з падраздзяленнямі Службы бяспекі Украіны атакавалі базу захоўвання БПЛА тыпу «Шагэд», што паблізу пасёлку Акцябрскі ў Ейскім раёне Краснадарскага краю Расеі.
Паводле звестак Генеральнага штабу ЗСУ, там захоўвалася каля 400 ударных дронаў.
«Па выніках аб’ектыўнага кантролю зафіксаванае дакладнае трапленне ў цэль. На тэрыторыі аб’екта назіралася другасная дэтанацыя», — гаворыцца ў паведамленні Генштабу.
Там адзначылі, што знішчэнне базы захоўвання «Шагэдаў» істотна знізіць магчымасць расейскіх войскаў «тэрарызаваць мірных жыхароў украінскіх гарадоў і вёсак».
Краснадарскія ўлады адмаўляюць атаку
У аператыўным штабе Краснадарскага рэгіёну паведамілі, што ў Акцябрскім гарэлі «складскія памяшканні» на плошчы каля 800 квадратных метраў. Там заявілі, што, папярэдне, пацярпелых няма, тэрыторыя ў межах 500 метраў ад месца пажару ачэпленая, пагрозы для жыхароў няма. Праз некалькі гадзін, як заяўляецца, пажар лакалізавалі на плошчы 1600 квадратных метраў. Да ночы агонь цалкам патушылі.
«Медуза» звяртае ўвагу на тое, што расейскія ўлады аб нападзе ЗСУ на Краснадарскі край не паведамлялі. Аператыўны штаб рэгіёну перад тым, як паведаміць пра пажар у Акцябрскім, называў фэйкамі паведамленні пра атаку беспілотнікаў і заклікаў давяраць «толькі афіцыйнай інфармацыі».
Між тым моцныя дэтанацыі на кадрах з Акцябрскага пацвярджаюць версію ўкраінскіх уладаў, піша тэлеграм-канал «Карты и стрелочки».
«Афігець, усё выбухоўвае», — кажуць відавочцы на відэа.
Тэлеграм-канал «Быть Или» адзначае, што напярэдадні ў Ейску таксама чулі выбухі, але пра наступствы не было нічога вядома: «Верагодна, з другой спробы ўсё ж удалося паразіць склад».
«Ейскі раён увесь час пад атакамі БПЛА, бо там вайсковы аэрадром», — заяўляе «ВЧК-ОГПУ».
Уначы 7 кастрычніка ў выніку атакі дронаў пачаўся моцны пажар на марскім нафтавым тэрмінале ў Феадосіі, другім у Крыме паводле аб’ёмаў перавалкі нафтапрадуктаў. Выбухі ў Феадосіі прагучалі каля 4:30 мясцовага часу. А ў ноч на 9 кастрычніка паведамлялася, што дроны атакавалі 67-і арсенал Галоўнага ракетна-артылерыйскага ўпраўлення Мінабароны РФ у горадзе Карачаў (Бранская вобласць), у выніку якой там пачалася дэтанацыя.
Якуб Хруст belsat.eu
