Ведамства паінфармавала «Белсат», пра што польскія дыпламаты размаўлялі з расейскім палітыкам.
Міністэрства замежных справаў Польшчы пракаментавала заявы расейскага апазіцыянера Іллі Яшына пра перамовы аб вызваленні палітвязняў у Беларусі і Расеі. У дэпартаменце інфармацыі ведамства «Белсату» пацвердзілі сустрэчу дыпламатаў з палітыкам на ягоную просьбу:
,,«Падчас сустрэчы спадар Яшын, апрача іншага, падзякаваў за арганізацыю абмену палоннымі, у якім ён сам быў удзельнікам. Аднак гэтая сустрэча пэўна не мела формы перамоваў. Мы таксама зняпраўджваем паведамленні пра нібыта прапанову дапамогі ў абмене зняволенымі з боку расейскай апазіцыі».
У МЗС таксама запэўнілі, што Варшава змагаецца за вызваленне ўсіх польскіх грамадзянаў, якіх трымаюць за кратамі за межамі краіны.
Раней Яшын паведаміў, што абмяркоўваў з польскімі дыпламатамі вызваленне беларускіх і расейскіх палітвязняў у абмен на шпіёнаў, арыштаваных у Польшчы.
«Адна з галоўных тэмаў – палітвязні. Я казаў пра тое, што было б вельмі правільна, карысна, слушна і гуманна працягваць практыку абменаў, пагатоў у польскіх турмах трымаюць дзясяткі расейскіх шпіёнаў», – казаў палітык у эфіры «Вот Так».
Ён таксама паспадзяваўся, што несправядліва асуджаныя выйдуць на волю:
«Было б вельмі правільна, калі б наступныя абмены (а мы спадзяемся, што яны адбудуцца) улучалі і прадстаўнікоў беларускай апазіцыі, бо людзі сядзяць за кратамі вельмі доўга, людзей літаральна катуюць, і ўмовы ўтрымання ў беларускіх турмах значна горшыя, чымся ў расейскіх, бо да беларускіх палітвязняў нават адвакатаў не пускаюць».
Яшын запэўніў, што падчас усіх размоваў з заходнімі палітыкамі і чыноўнікамі заўсёды згадвае і беларускіх палітвязняў:
«Я і мае калегі, і Уладзімір Кара-Мурза, і Юлія Навальная, – мы кажам пра лёс і ўкраінскіх ваеннапалонных і цывільных арыштаваных, і, натуральна, пра нашых беларускіх, можна сказаць, аднадумцаў, якія дамагаюцца еўрапейскай будучыні для сваёй краіны: і пра Марыю Калеснікаву, і пра Алеся Бяляцкага, і пра Віктара Бабарыку і ягонага сына Эдуарда, з якім я, дарэчы, асабіста знаёмы яшчэ задоўга да таго, як ён пачаў займацца палітыкаю».
Дар'я Форман, Сцяпан Кубік belsat.eu
