Праз пажару на нафтабазе ў Феадосіі, што ў акупаваным Расеяй Крыме, эвакуяваныя 1047 чалавек. Пра гэта паведаміў кіраўнік расейскай адміністрацыі гораду Ігар Ткачэнка.
«Пасля рэгістрацыі і агляду медыкамі людзей размясцілі ў гатэлях і пансіянатах гораду», ‒ заявіў Ігар Ткачэнка ў тэлеграм-канале. Свае дамы былі вымушаныя пакінуць жыхары Чарнаморскай набярэжнай і Бліжніх Камышоў.
Пажарнікі станам на раніцу 8 кастрычніка працягваюць працаваць на месцы здарэння, спрабуючы зліквідаваць узгаранне.
Уначы 7 кастрычніка ў выніку атакі дронаў адбыўся пажар на марскім нафтавым тэрмінале ў Феадосіі, другім у Крыме паводле аб’ёмаў перавалкі нафтапрадуктаў. Выбухі ў Феадосіі прагучалі каля 4:30 мясцовага часу.
Тэрмінал у Феадосіі ўжо зазнаваў атакі БПЛА. У сакавіку 2024-га на яго ўпалі адразу чатыры дроны, у выніку чаго быў пашкоджаны магістральны трубаправод для перапампоўвання паліва. Падчас ліквідацыі пажару з прадпрыемства давялося эвакуяваць працаўнікоў.
Якуб Хруст belsat.eu
