На Блізкім Усходзе працягваюцца збройныя сутыкненні паміж ліванскаю групоўкаю «Хізбула» і Арміяй абароны Ізраілю, таксама вядомай як Цагаль.
Прэс-служба Цагалю паведаміла, што 7 кастрычніка ізраільскія ВПС нанеслі кропкавы ўдар у раёне Бэйруту і зліквідавалі Сухайля Хусэйна Хусэйні, кіраўніка штабнога апарату «Хізбулы». Штабны апарат ‒ лагістычнае штабное падраздзяленне «Хізбалы», займаецца ўсім, што звязана з бюджэтам і арганізацыяй розных структураў. Хасіні браў удзел у пагадненнях аб перадачы ўзбраенняў паміж Іранам і «Хізбулой» ды адказваў за транспартаванне і размеркаванне кантрабанднаю зброі паміж рознымі падраздзяленнямі.
Тым часам увечары 7 кастрычніка на тэрыторыю Лівану ўвайшлі сілы ізраільскай 146-й бранятанкавай дывізіі «Га-Мапац». У выніку цяпер ў Ліване дзеюць ужо чатыры дывізіі Цагалю.
Таксама паведамляцца, што ВПС Цагалю нанеслі ўдары ў ваколіцы Тыру, на паўднёвым захадзе Лівану, і на на поўдні Бэйруту. Раней удары па цэлях у Бэйруце былі нанесеныя ўвечары 7 кастрычніка.
Акрамя таго, ізраільскія войскі пашыраюць наземную аперацыю ў паўночнай частцы палестынскага сектару Газа. Раніцаю 8 кастрычніка былі раскіданыя з паветра ўлёткі над Бэйт-Ляг'яй з заклікам да мясцовых жыхароў неадкладна эвакуявацца ў паўднёва-заходнія раёны сектару, у гуманітарную зону. Паступаюць паведамленні, што сілы Цагалю ўзрываюць будынкі ў Джабаліі, на поўначы сектару Газа. Там таксама чуваць страляніна.
Між тым «Хізбула» ўвечары 7 кастрычніка абстраляла ракетамі поўнач і цэнтр Ізраілю. Сігнал трывогі ранняга папярэджання прагучаў таксама ў Тэль-Авіве. У Цагалі паведамілі, што зафіксавалі запуск пяці ракетаў з Лівану, частка з іх была перахопленая, а рэшта ўпала на незабудаванай тэрыторыі. У «Хізбуле» заявілі, што цэллю ракетнай атакі была вайсковая база «Глілёт», база падраздзялення радыёэлектроннай выведкі 8200.
Раніцаю 7 кастрычніка 2023 года Ізраіль атакавалі ракеты з сектару Газа, а пасля баевікі «Хамасу» ўварваліся на тэрыторыю Ізраілю, у тым ліку ў месцы, дзе праходзіў музычны фэст. Паводле ізраільскіх звестак, у выніку атакі 7 кастрычніка былі забітыя блізу 1200 ізраільцянаў і замежнікаў, а блізу 250 закладнікаў былі вывезеныя ў Газу.
Поўнамаштабная наземная аперацыя Ізраілю ў Газе пачалася 27 кастрычніка. Гэта ператварыла наступствы нападу «Хамасу» ў самы буйны ваенны канфлікт на Блізкім Усходзе за апошнія 50 гадоў.
Улетку 2024 года інтэнсіўнасць ізраільскіх дзеянняў у сектары Газа пачала зніжацца. Аднак з канца вясны больш прыкметную ролю ў канфлікце адыгрывае «Хізбула». У некаторыя дні групоўка біла па тэрыторыі Ізраілю сотнямі ракетаў. У выніку нападаў «Хізбулы» ў Ізраілі былі эвакуяваныя ад 60 да 100 тысяч асобаў.
Ізраільскія ўлады паставілі сабе задачу вярнуць жыхароў паўночных рэгіёнаў Ізраілю ў іхныя дамы. Гэта прадугледжвала больш актыўную барацьбу з «Хізбулой». 17 і 18 верасня ў Ліване пачалі масава выбухаць пэйджары ды іншыя прылады сувязі, якімі карысталіся чальцы «Хізбулы». Мясцовыя ўлады паведамілі пра мінімум 37 загінулых і каля 3600 параненых. Апрача таго, у выніку паветраных нападаў на інфраструктуру «Хізбулы» ў Ліване 27 верасня былі забітыя лідар групоўкі Хасан Насрала і шэраг яе высокапастаўленых камандзіраў. Улетку быў знішчаны і лідар «Хамасу» Ісмаіл Ганія.
Якуб Хруст belsat.eu
