Міністэрства ўнутраных справаў Беларусі 7 кастрычніка прызнала Міжнародны камітэт расследавання катаванняў «экстрэмісцкім фармаваннем». Адпаведнае рашэнне з’явілася ў абноўленым пераліку МУС.
«Група грамадзянаў з ліку прадстаўнікоў ініцыятывы „Міжнародны камітэт расследавання катаванняў“ ажыццяўляе экстрэмісцкую дзейнасць», ‒ адзначаецца ў пераліку.
У звязку з камітэтам згадваюцца імёны Сяргея Усцінава і Вікторыі Федаровіч. У пералік таксама залучаныя сайт камітэту, яго электронная пошта, Telegram-канал і бот, а таксама Instagram.
Міжнародны камітэт расследавання катаванняў у Беларусі ‒ спецпраект праваабарончай арганізацыі «Прававая ініцыятыва», заснаваны разам з беларускімі і міжнароднымі праваабаронцамі.
Прадстаўнікі камітэту фіксуюць выпадкі катаванняў, публікуюць справаздачы і расследаванні, інфармуюць міжнародныя органы пра сітуацыю з правамі чалавека ў Беларусі, шукаюць сведкаў і доказы катаванняў, надаюць юрыдычную дапамогу пацярпелым і рыхтуюць паведамленні і скаргі ў міжнародныя органы.
Якуб Хруст belsat.eu
