Цэнтр даследванняў Усходняй Еўропы Варшаўскага ўніверсітэта праводзіць новы набор кандыдатаў на праграму спецыялізаванага навучання «Новыя кадры для Новай Беларусі», якая была створана ў 2020 годзе пры падтрымцы ў тым ліку Народнага антыкрызіснага ўпраўлення.
Анансуюць модульную праграму, скіраваную на адукацыю новых беларускіх дыпламатычных кадраў. Курс будзе ўключаць аналіз палітычнай сітуацыі ў Беларусі, Украіне і на ўсёй постсавецкай прасторы, тэорыю і практыку палітыкі і дыпламатыі, асновы знешняй палітыкі і бяспекі, дыпламатычны пратакол, міжнароднае права і шмат іншага.
Навучанне абяцаюць праводзіць у супрацы з Міністэрствам замежных справаў Польшчы. Лекцыі для слухачоў таксама правядуць намеснік кіраўніцы Аб’яднанага Пераходнага Кабінета, кіраўнік Народнага антыкрызіснага ўпраўлення, дыпламат Павел Латушка і прадстаўнік па міжнародным і еўрапейскім супрацоўніцтве Аб’яднанага пераходнага кабінету, кіраўнік Місіі дэмакратычнай Беларусі ў Бруселі, дыпламат Уладзімір Астапенка.
Навучанне бясплатнае, са стыпендыяй у 2700 злотых на месяц. Падчас курсу абяцаюць заняткі па польскай і французскай мовах, а таксама магчымасць стажавання ў польскіх і міжнародных установах. Але месцаў толькі 20.
Патрабаванні да кандыдатаў такія:
- беларускае грамадзянства;
- вышэйшая адукацыя;
- веданне і цікаўнасць да пытанняў палітыкі і міжнародных адносінаў у рэгіёне Цэнтральнай і Усходняй Еўропы;
- валоданне англійскай мовай як мінімум на ўзроўні B2;
- валоданне польскай мовай;
- узрост: да 35 гадоў;
- знаходжанне ў Варшаве.
Заяўкі прымаюць да 22 кастрычніка ўключна. Сумоўі пройдуць 28–31 кастрычніка, пачатак лекцыяў – 2 снежня 2024 года. Неабходныя дакументы апісаныя тут. Іх трэба зляпіць у адзін PDF-файл і выслаць на адрас cd.studium@uw.edu.pl.
«Праграма „Новыя кадры для Новай Беларусі“ з’яўляецца важным падмуркам для падрыхтоўкі нацыянальна-арыентаваных дыпламатычных кадраў для новай сістэмы Беларусі. Калі б сёння ўзнікла патрэба стварыць новы склад МЗС, мы былі б гатовы ажыццявіць гэта на базе выпускнікоў праграмы», — заявіў Латушка.
У НАУ адзначаюць, што многія выпускнікі мінулых набораў ужо працуюць у Каардынацыйнай радзе, ініцыятыве «Сумленныя людзі», у самім НАУ і ў іншых беларускіх дэмакратычных арганізацыях.
Алесь Наваборскі belsat.eu
