У 2021–23 гадах пікі міграцыйнага крызісу, штучна створанага ўладамі Беларусі на межах з Польшчай, Літвой і Латвіяй, прыпадалі на кастрычнік–лістапад. Але не ў 2024 годзе.
У Telegram-канале «Што думаюць беларусы» сацыёлага Генадзя Коршунава апублікавалі чарговую статыстыку зафіксаваных спробаў незаконнага пераходу межаў Польшчы, Літвы і Латвіі з боку Беларусі. І гэтая статыстыка анамальная.
Пік міграцыйнага крызісу ў мінулыя гады – 2021, 2022 і 2023 – прыпадаў на кастрычнік-лістапад. Але ў 2024-м найбольш спробаў незаконнага пераходу мяжы было ў сярэдзіне верасня, а далей інтэнсіўнасць крызісу пайшла на спад. На мінулым тыдні была мінімальная колькасць спробаў аж з канца лютага.
,,«З чым тое звязана, – ці то проста з надвор'ем, ці з чарговай спробай беларускіх уладаў камусьці „падміргнуць“, – пакуль незразумела», – пішуць на канале «Што думаюць беларусы».
Варта ўлічваць, што гэтая статыстыка адлюстроўвае толькі зафіксаваныя спробы. То бок, нельга выключаць, што памежнікі сталі выяўляць меншы адсотак спробаў незаконнага пераходу мяжы.
З другога боку, гэта не адзіная анамалія на межах Беларусі з дзяржавамі Еўразвязу. Так, літоўскія памежнікі ўсё радзей назіраюць спробы незаконна перайсці мяжу з боку Беларусі, хоць у чэрвені-ліпені 2021 года – у пачатку крызісу – такіх спробаў было па некалькі тысяч на месяц. У суседняй Латвіі, мяжа з якой у Беларусі ў чатыры разы карацейшая, фіксуюць у разы больш спробаў. Але найбольшая колькасць мігрантаў спрабуе трапіць незаконным шляхам у Польшчу.
Акрамя таго, за верасень з Беларусі ў Літву прыляцела не менш за 250 паветраных шароў з кантрабанднымі цыгарэтамі, адзін упаў у віленскім аэрапорце. Камандуючы Службай аховы дзяржаўнай мяжы Рустамас Любаевас выказаў сумнеў у тым, што іх можна выкарыстоўваць для выведкі. Разам з тым, пра тэндэнцыю праінфармавалі партнёраў Літвы.
Польшча тым часам збіраецца пачаць будаваць «Шчыт Усход» – новыя ўмацаванні на межах з Беларуссю і Расеяй. Гэта ўжо не сцяна супраць міграцыі, а вайсковыя ўмацаванні з міннымі палямі і бетоннымі блокамі. Плот ад мігрантаў, як паказала практыка, мігрантаў не спыняе, а хіба запавольвае.
Алесь Наваборскі belsat.eu
