Кіраўнік адміністрацыі Лукашэнкі Дзмітрый Крутой адзначыў, што ў Беларусі расце папулярнасць навучання на беларускай мове.
Паводле словаў Дзмітрыя Крутога, сёння існуе вялікі запыт на навучанне па-беларуску.
,,«Мы з нашым міністрам адукацыі абмяркоўваем, можа быць, неяк больш ярка паказаць тыя навучальныя ўстановы, якія праводзяць навучанне толькі на беларускай мове», – сказаў у каментары для СТВ Дзмітрый Крутой.
Паводле чыноўніка, разглядаецца імавернасць абвесціць 2025-ы Годам беларускай мовы. Але пастановы яшчэ не прыняў Аляксандр Лукашэнка: той, маўляў, яшчэ думае над гэтым пытаннем.
Дзмітрый Крутой падзяліўся ўспамінамі пра пачатковую школу, дзе ўсе заняткі праводзіліся на беларускай мове. Ён адзначыў, што гэты час быў адным з самых прыемных у ягоным жыцці, бо ён з задавальненнем слухаў настаўнікаў і не чакаў перапынкаў. Асаблівае ўражанне на яго пакінулі менавіта настаўнікі, выхаваныя ў савецкі час, якія мелі высокія патрабаванні да вучняў.
Крутой таксама згадаў, што, калі ён пераехаў у раённую школу, яму спатрэбілася каля паўгода, каб прызвычаіцца да заняткаў па-расейску, бо некаторыя прадметы выкладаліся ўжо на іншай моўнай аснове.
У краіне сёння каля 40 % школаў беларускамоўныя, у іх праходзяць навучанне 10 % усіх вучняў. Намеснік міністра адукацыі Беларусі Аляксандр Кадлубай назваў такую сістэму «абсалютна ўраўнаважанай з гледзішча моваў».
У той жа час звесткі сведчаць, што колькасць вучняў, якія атрымліваюць адукацыю па-беларуску, няўхільна зніжаецца: у 1994–1995 гадах па-беларуску ў школах вучыліся 29,4 % вучняў, у 2007–2008 гадах – 20,9 %.
Раман Шавель belsat.eu
