Экс-прэзідэнт Расеі даў гэта зразумець, каментуючы меркаванне ўкраінскага дэпутата пра неабходнасць «перанесці вайну ў Беларусь».
Напярэдадні дэпутат Вярхоўнай Рады Украіны, сукіраўнік міжфракцыйнага дэпутацкага аб’яднання «За дэкаланізацыю Расеі» Алег Дунда заявіў, што «выйграць вайну пад Пакроўскам або Вугледарам немагчыма, а вось выйграць вайну на тэрыторыі Расейскай імперыі ці ў Беларусі – цалкам магчыма».
«Мой пункт гледжання – абсалютна важна пераносіць не толькі на тэрыторыю Бранску і Курску, але і ў Беларусь. Я глыбока ўпэўнены: калі зойдзем адносна невялікімі падраздзяленнямі ў Беларусь, беларуская армія складзе сваю зброю. А гэта вялікі ўдар пад дых Маскве: паказаць, што яна не кантралюе гэтыя тэрыторыі, не гатовая абараняць іх. Мы не мусім спыняцца, мы мусім пашыраць гэтыя аперацыі», – сказаў Дунда ў Вільні на Форуме свабоднай Расеі.
Гэтую заяву ў сваім Telegram-канале і ў сваёй манеры пракаментаваў колішні прэзідэнт, намеснік старшыні Рады бяспекі Расеі Дзмітрый Мядзведзеў. Заадно ён даў зразумець, што Аляксандр Лукашэнка расейскай ядравай зброяй, завезенай у Беларусь, не распараджаецца: давядзецца прасіць дазволу ў Крамлі.
«Нейкая смярдзючая кіеўская Дунда прапанавала перанесці вайну ў Беларусь. Ну тады ў Аляксандра Рыгоравіча будзе поўная падстава звярнуцца да Расеі для выкарыстання размешчанай у Беларусі тактычнай ядравай зброі. І яму цяжка будзе адмовіць у задавальненні паглядзець на агеньчыкі ў Кіеве», – напісаў Мядзведзеў.
У каментары «Белсату» 5 кастрычніка Алег Дунда ўдакладніў, што для правядзення ў Беларусі гэткай жа аперацыі, як у Курскай вобласці, трэба, каб нехта з беларусаў быў гатовы ўзяць на сябе ўладу і кіраванне тэрыторыямі. Галоўнае, каб гэтага лідара падтрымалі замежныя партнёры і каб грамадства прыняла яго на час да правядзення дэмакратычных выбараў.
«Проста акупацыйная аперацыя не мае сэнсу. Гэта мусіць быць супольная аперацыя з партнёрамі, з прадстаўнікамі беларускай грамадскасці. Патрэбны лідар, які будзе ісці фактычна з нашай арміяй і якога беларусы будуць гатовыя прыняць, бо мы – не акупанты і не павінны кіраваць Беларуссю. Беларуссю мусяць кіраваць самі беларусы», – сказаў дэпутат Рады.
Ён упэўнены, што беларускае грамадства не будзе аказваць супраціву ўкраінскім вайскоўцам:
«Беларускае грамадства абсалютна аморфнае, можна сказаць, што ніякага пратэсту супраць такіх ваенных дзеянняў не будзе. Бо калі б была нейкая грамадская пазіцыя, нават у дачыненні Лукашэнкі, яна праявілася б, а яе няма. Фактычна, беларусы не гатовыя праяўляць сваю пазіцыю, таму пры магчымай аперацыі ў Беларусі гэтай пазіцыі таксама не будзе».
27 верасня Лукашэнка назваў умову выкарыстання ядравай зброі. Ён заявіў, што «як толькі яны нападаюць на нас, мы ўжываем ядравую зброю», намякнуўшы на NATO.
«Мы ім адкрыта кажам: чырвоная лінія – гэта дзяржаўная мяжа. Наступілі на яе – адказ будзе вокамгненным. Мы да гэтага рыхтуемся», – сказаў палітык.
Сцяпан Кубік belsat.eu
