На ксяндза Анджэя Юхневіча, які ў зняволенні з 8 траўня 2024 года, працягваюць уздзейнічаць рознымі спосабамі, у тым ліку праз пагрозы.
Як паведамляе «Хрысціянская візія», Анджэй Юхневіч ужо зазнаў катаванні і перашкоды ў доступе да элементарных умоваў, такіх як магчымасць прыняць душ, якую яму далі толькі праз два месяцы пасля арышту.
Юхневіч актыўна абскарджваў пастановы адносна свайго зняволення, што прывяло да пераходу пераследу з адміністратыўнага на крымінальны ўзровень.
Цяпер, адзначаецца ў паведамленні, яму пагражаюць фальшывымі абвінавачаннямі ў злачынствах супраць сексуальнай недатыкальнасці непаўналетніх, што можа сур'ёзна пашкодзіць ягонай рэпутацыі.
Падобныя пагрозы ўжо выказваліся і іншым каталіцкім святарам у Беларусі, але даказаць такія злачынствы ніколі не ўдавалася.
Ксёндз Анджэй Юхневіч, святар ордэна Місіянераў Аблатаў Беззаганнай Марыі, кіраўнік каардынацыйнай групы пробашчаў і прадстаўнікоў манаскіх супольнасцяў Беларусі, мае бездакорную рэпутацыю ў каталіцкім асяроддзі Беларусі.
У ліпені 2024 года ад адвакатаў Анджэя Юхневіча сталася вядома, што ксёндз цяпер у знясіленым стане.
Раман Шавель belsat.eu
