Пераемнік лідара «Хізбулы» Хасана Насралы Гашым Сафі ад-Дын таксама мог быць забіты. Пра гэта паведамляюць медыі.
Сувязь з Гашымам СафІ ад-Дынам страчаная ў пятніцу ўвечары пасля ізраільскага ўдару, скіраванага на паўднёвыя прыгарады Бэйруту, паведамляе «Reuters», спасылаючыся на крыніцу ў службах бяспекі Лівану.
Вядома, што Ізраіль нанёс моцны ўдар па прыгарадзе Бэйруту ўвечары чацвярга. Выданне Axios са спасылкаю на ізраільскіх чыноўнікаў сцвярджае, што цэллю ўдараў быў падземны бункер Гашыма Сафі ад-Дына.
У сваю чаргу, крыніцы тэлеканалу «Аль-Арабія» сцвярджаюць, што стрыечны брат і імаверны пераемнік Хасана Насралы на ролю лідара «Хізбулы» быў забіты разам са сваймі памочнікамі і палявымі камандзірамі.
Нагадаем, што Гашым Сафі ад-Дын называўся пераемнікам лідара «Хізбулы» Хасана Насралы, які быў забіты ў выніку ізраільскіх удараў 27 верасня.
Наземная аперацыя ізраільскай арміі (Цагаль) у Ліване зрабілася кульмінацыяй канфлікту паміж Ізраілем і «Хізбулой», што пачаўся пасля тэрарыстычнага нападу «Хамасу» 7 кастрычніка 2023 года. Цягам месяцаў баевікі «Хізбулы» абстрэльвалі ізраільскія памежныя раёны, што прывяло да эскалацыі, ахвяраў сярод цывільнага насельніцтва і эвакуацыі дзясяткаў тысяч людзей. У адказ Ізраіль наносіў авіяўдары па інфраструктуры групоўкі і здзейсніў маштабную дыверсію, падчас якой у Ліване адбыліся масавыя выбухі прыладаў сувязі, якімі карысталіся чальцы «Хізбулы». Усё гэта значна аслабіла магчымасці арганізацыі.
У верасні 2024 года Ізраіль узмацніў вайсковыя дзеянні, забіўшы лідара «Хізбулы» Хасана Насралу і шэраг камандзіраў групоўкі. На фоне значных стратаў сярод баевікоў і слабай рэакцыі «Хізбулы» ізраільскі ўрад пастанавіў пачаць наземную аперацыю для ліквідацыі пагрозы з Лівану і вяртання жыхароў паўночных рэгіёнаў Ізраілю ў свае дамы.
Раман Шавель belsat.eu
