Пятніца, 4 кастрычніка, адзначылася навінамі пра завочныя суды і прысуды па палітычна матываваных справах, папаўненнем пераліку «экстрэмісцкіх матэрыялаў», затрыманнямі за здымкі ваеннай тэхнікі і выбуху «Шагэду». Падрабязней – у нашым аглядзе.
За татуіроўку ACAB затрымалі былога заўзятара «БАТЭ». У «пакаяльным відэа» мужчына кажа, што раней быў судзімы за крадзеж, разбой і захоўванне наркотыкаў, і што абавязуецца звесці «нацысцкія татуіроўкі».
За здымкі ваеннай тэхнікі ў Лоеве затрымалі 29-гадовага мужчыну. Паводле праўладных тэлеграм-каналаў, у ягоным тэлефоне знайшлі шмат відэа і фота з месцамі дыслакацыі вайскоўцаў і ваеннай тэхнікі і падпіскі на «экстрэмісцкія каналы».
КДБ і САХР затрымалі жанчыну, якая зняла відэа падзення «Шагэду» у Калінкавічах. Ёй пагражаюць крымінальнай справай за «супрацу з экстрэмісцкімі рэсурсамі».
У Гомельскім абласным судзе 15 кастрычніка пачнуць судзіць грамадзяніна Украіны Вячаслава Бародзія і беларусаў Мікалая Ласоўскага і Валянціну Полаз. Іх абвінавачваюць у «здрадзе дзяржаве» і «агентурнай дзейнасці».
Крымінальную справу супраць Аскера Аллахвярдзіева пачалі разглядаць у закрытым рэжыме ў Менскім гарадскім судзе. Мужчыне інкрымінуюць удзел на тэрыторыі замежнай дзяржавы ва ўзброеным фармаванні або ўзброеным канфлікце, ваенных дзеяннях, вярбоўцы або падрыхтоўцы асобаў да такога ўдзелу.
25-гадовую актывістку з Рэчыцы Бажэну Жолудзь 2 кастрычніка Магілёўскі абласны суд асудзіў да пяці гадоў калоніі. Бажэну прызналі вінаватай у незаконных дзеяннях у дачыненні да інфармацыі аб прыватным жыцці і персанальных дадзеных, закліках да санкцыяў і ў абразе суддзі.
Палітвязню, анархісту Сяргею Раманаву 24 верасня ў судзе Горацкага раёну дадалі яшчэ два гады зняволення. Яго прызналі вінаватым паводле ч. 2 арт. 411 КК («Злоснае непадпарадкаванне адміністрацыі калоніі»). У сакавіку 2023 года Раманаву дадавалі 11 месяцаў калоніі паводле гэтага ж артыкулу. Агульны тэрмін зняволення палітвязня складае 22 гады і 11 месяцаў.
Агучылі прысуд па «справе Мачулішчаў». Дванаццаці фігурантам, большасці завочна, ставілася ў віну адразу 11 артыкулаў Крымінальнага кодэксу, у тым ліку «акт тэрарызму» (ч. 3 арт. 289 КК) і «здрада дзяржаве» (ч. 1 арт. 356 КК). Галоўнага фігуранта, грамадзяніна Украіны Мікалая Швеца, які быў вызвалены ў чэрвені па абмене з Украінай, завочна асудзілі да 25 гадоў калоніі.
56-гадоваму журналісту Ігару Карнею падоўжылі знаходжанне ў ПКТ. У сакавіку яго асудзілі да 3 гадоў калоніі за «удзел у экстрэмісцкім фармаванні». Улетку Ігара зьмясцілі ў ПКТ першы раз. Тэрмін пакарання мусіў cкончыцца ў жніўні, але цяпер стала вядома, што ў атрад з ПКТ палітвязень так і не вярнуўся.
Супраць былога выканаўчага дырэктара «Беларускай рады культуры» Аляксандра Чахоўскага зноў распачалі спецыяльнае вядзенне — яго збіраюцца судзіць завочна за стварэнне «экстрэмісцкага фармавання» і садзейнічанне «экстрэмісцкай дзейнасці». 24 чэрвеня Чахоўскага ўжо асудзілі завочна да 3 месяцаў арышту.
Тэлеграм-канал беларускага палітолага Валерыя Карбалевіча прызналі «экстрэмісцкім». Адпаведнае рашэнне прынятае судом Ленінскага раёну Горадні 1 кастрычніка.
Марыя Міхалевіч belsat.eu
