Літоўскі суд стаў на бок звольненага ў канцы 2023 года выкладчыка Еўрапейскага гуманітарнага ўніверсітэту (ЕГУ) Сяргея Сялецкага. Мужчына судзіўся супраць свайго былога працадаўцы і цалкам задаволены выракам суда. Паводле прысуду, Сялецкага мусяць аднавіць на працоўным месцы, універсітэт абавязаны выплаціць кампенсацыю.
Сяргей Сялецкі – беларускі мастак і выкладчык ЕГУ. Скандал вакол яго разгарэўся на пачатку верасня мінулага года, тады былыя і цяперашнія студэнткі абвінавацілі дацэнта ў гарасмэнце. Гарасмэнт – гэта прыставанні і сексуальныя дамаганні.
Са словаў меркаваных пацярпелых, ён адпускаў рэзкія каментары пра іх нацыянальнасць або месцы працы, то бок займаўся булінгам. Некаторыя са студэнтак заявілі і пра сексуалізаваныя дамаганні. Уся гэтая сітуацыя стала падставай для адмены выставы Сялецкага ў Віленскай арт-прасторы «Create Culture Space», але на гэтым справа не скончылася.
Тым, што адбывалася, зацікавіліся беларускія медыі. Некаторыя з іх далі слова ўсім удзельнікам падзеяў: самому Сялецкаму, меркаваным пацярпелым, мастацкай галерэі, ЕГУ.
У выніку былі апублікаваныя сведчанні меркаваных пацярпелых і сведак паводзінаў выкладчыка. Пасля гэтага Сялецкага часова адхілілі ад працы да заканчэння разбору, а яшчэ праз два тыдні пасля вялікага паседжання ўніверсітэту і адпаведнай камісіі выкладчык быў звольнены. Дарэчы, універсітэт адлічыў і студэнтку Таццяну Барысаву, якая публічна распавяла пра гарасмэнт.
Сёння стала вядома, што літоўскі суд стаў на бок звольненага Сялецкага. Пра гэта «Еўрарадыё» паведаміла ягоная адвакатка Эвэліна Трушкініене.
Паводле юрысткі, звальненне Сялецкага было прызнанае неправамерным. Мужчыну прысудзілі кампенсацыю за прастой у працы цягам дзевяці месяцаў, калі ён не мог выконваць сваіх абавязкаў выкладчыка, а таксама за маральную шкоду і выдаткі на юрыдычную абарону. Агульная сума кампенсацыі складзе каля 40 тыс. еўраў. Таксама ЕГУ абавязалі аднавіць Сялецкага на працоўным месцы, паколькі прысуд ужо часткова ўвайшоў у сілу. У ЕГУ ёсць 30 дзён, каб падаць апеляцыю.
Надзея Вольная belsat.eu
