Кіраўнік Народнага антыкрызіснага ўпраўлення, намеснік кіраўніцы Аб’яднанага пераходнага кабінету Павел Латушка паведаміў, што матэрыялы справы пра «трансмежныя злачынствы супраць чалавечнасці, учыненыя Лукашэнкам і ягонымі саўдзельнікамі» перададзеныя ў Палату папярэдняга вядзення Міжнароднага крымінальнага суда (МКС).
Як распавёў Павел Латушка, для справы «прызначаныя суддзі» і«сфарраваная група асобаў, якія будуць займацца расследаваннем».
«Вынясенне першага выраку адносна сітуацыі ў Беларусі падкрэслівае важнасць міжнароднага правасуддзя і гатовасць міжнароднай супольнасці расследаваць злачынствы рэжыму Лукашэнкі», – заявіў палітык і дадаў, што ўсё, што цяпер адбываецца – гэта «выразны сігнал таму, што беспакаранасць не будзе дапушчаная».
«Мы заклікаем усе дзяржавы прытрымлівацца прыкладу Літвы і супрацоўнічаць з Міжнародным крымінальным судом для дасягнення справядлівасці», – выказаўся Латушка.
Нагадаем, 30 верасня ўрад Літвы перадаў у офіс пракурора МКС матэрыялы пра «трансмежныя злачынствы супраць чалавечнасці, учыненыя Лукашэнкам і ягонымі саўдзельнікамі ў дачыненні беларусаў». Вільня патлумачыла свой крок тым, што больш не можа бяздзейнічаць. Беларускія дэмакратычныя сілы заклікалі краіны, што ратыфікавалі Рымскі статут, падтрымаць намаганні Літвы ў прыцягненні Лукашэнкі да адказнасці ў МКС.
Міністэрства замежных справаў Польшчы ўжо падтрымала зварот Літвы ў Міжнародны крымінальны суд (МУС) у Гаазе з нагоды меркаваных злачынстваў супраць чалавечнасці, учыненых рэжымам Лукашэнкі.
Пры гэтым 3 кастрычніка міністр замежных справаў Беларусі Максім Рыжанкоў назваў зварот Літвы ў Гаагу «бесперспектыўным».
Надзея Вольная belsat.eu
