Кіраўнік МЗС Беларусі Максім Рыжанкоў заявіў, што абвінавачванні на адрас беларускіх уладаў, якія ўтрымліваюцца ў звароце Літвы ў Міжнародны крымінальны суд абсурдныя і бесперспектыўныя, паведамляе «РИА Новости».
«Не трэба быць прызнаным экспертам у галіне міжнароднага права, каб зразумець абсурднасць і надуманасць выстаўленых абвінавачванняў. Для нас відавочная бесперспектыўнасць патугаў Вільні і іх куратараў», – сказаў Максім Рыжанкоў.
Ён дадаў, што беларускія ўлады спакойна глядзяць «на гэтую валтузню» і не перастануць заклікаць суседзяў «да разважлівасці і адэкватнасці».
30 верасня ўрад Літвы скарыстаўся сваім правам па Рымскім статуце і афіцыйна перадаў у Офіс пракурора Міжнароднага крымінальнага суда ў Гаазе матэрыялы, якія тычацца здзяйснення прадстаўнікамі рэжыму Лукашэнкі трансгранічных злачынстваў супраць чалавечнасці ў дачыненні да беларусаў.
Літва заклікае краіны свету далучацца і разам прыцягнуць Аляксандра Лукашэнку і ягоных памагатых да адказнасці. Літву падтрымаў МЗС Польшчы.
Літоўскі ўрад звярнуўся да пракурора Міжнароднага крымінальнага суда на просьбу НАУ і на падставе матэрыялаў, якія сабраныя арганізацыяй на чале з намеснікам Святланы Ціханоўскай у Аб’яднаным пераходным кабінеце Паўлам Латушкам.
Арсен Рудэнка belsat.eu
