Уначы 3 кастрычніка ў Беларусь чарговы раз заляцеў беспілотнік тыпу «Shahed». Пра гэта паведамляюць Паветраныя сілы Украіны.
Расея атакавала Украіну мінімум 105 беспілотнікамі мінулаю ноччу. 78 з іх былі знішчаныя, а 23 – лакацыйна страчаныя.
«Адзін беспілотнік паляцеў у кірунку Беларусі», – пішуць Паветраныя сілы Украіны.
Авіяцыя ў Беларусі пры гэтым не падымалася, адзначае маніторынгавая група «Беларускі Гаюн»:
«Вядома, што "Shahed" пакінуў Кіеўскую вобласць Украіны і заляцеў у Беларусь курсам на Мазыр каля 4:40».
Што адбылося з дронам потым, невядома. Паводле звестак «Флагшток» жыхары Калінкавічаў чулі выбух. Ён мог быць выкліканы падзеннем дрона.
З 11 ліпеня ў Беларусь заляцела каля 50 «Shahed'аў», якія атакавалі Украіну, але збіліся з курсу. Імаверна, гэта адбываецца праз працу ўкраінскіх сродкаў радыёэлектроннай барацьбы. Таксама «Shahed'ы» могуць залятаць у Беларусь, каб схавацца ад украінскай паветранай абароны. Аднак Мінабароны Беларусі скардзіцца, што гэта ўсё ўкраінскія правакацыі.
Некаторыя з дронаў беларускай авіяцыі давялося збіваць.
Арсен Рудэнка belsat.eu
