Міністэрства інфармацыі Беларусі дадало ў спіс «экстрэмісцкіх» матэрыялаў старонку ў сацсетцы X (былы Twitter) спецпрадстаўніка МЗС Польшчы ў супрацы з дэмакратычнымі сіламі Беларусі Артура Міхальскага.
У Рэспубліканскім спісе экстрэмісцкіх матэрыялаў можна знайсці апісанне старонкі ў X «Artur Michalski» (https://x.com/michalski_artur). Адпаведную пастанову прыняў суд Цэнтральнага раёну Менска за 25 верасня, заўважыў Reform.news.
Артур Міхальскі – былы амбасадар Польшчы ў Беларусі. Там ён працаваў з траўня 2018 года да жніўня 2023 года. З Беларусі з'ехаў у кастрычніку 2020 года. У верасні 2023-га яго прызначылі адмысловым прадстаўніком МЗС Польшчы ў супрацы з беларускімі дэмакратычнымі сіламі.
Адзін з апошніх запісаў на старонцы Артура Міхальскага ў X – рэпост кіраўніка НАУ і намесніка Святланы Ціханоўскай у Аб'яднаным пераходным кабінеце Паўла Латушкі. У сваім запісе Латушка дзякуе МЗС Польшчы за тое, што ведамства падтрымала просьбу Літвы, каб пракурор Міжнароднага крымінальнага суда расследаваў сітуацыю ў Беларусі на прадмет магчымых злачынстваў супраць чалавечнасці.
Таксама Міхальскі часта публікуе допісы пра беларускіх палітвязняў.
Акрамя старонкі Артура Міхальскага, спіс «экстрэмісцкіх» матэрыялаў папоўнілі Instagram-акаўнт адваката Марыі Колесавай-Гудзілінай «kolesovahudzilina» і акаўнт мастачкі і актывісткі з каманды BYSOL Марыі – «animia.masha». З X дадалі старонку «Кацап смажыўся на патэльні».
Арсен Рудэнка belsat.eu
