Міністэрства замежных справаў Польшчы цалкам падтрымлівае літоўскі зварот у Міжнародны крымінальны суд.
«Шаноўнае спадарства! Маю гонар прэзентаваць пазіцыю Міністэрства замежных справаў адносна звароту ўраду Літвы ад 30 верасня ў Міжнародны крымінальны суд з просьбаю разгледзець, ці здзейсніў рэжым Аляксандра Лукашэнкі злачынствы супраць чалавечнасці. Пазіцыя наступная: зварот літоўскага ўраду ў Міжнародны крымінальны суд і вывучэнне пракурорам Міжнароднага крымінальнага суда сітуацыі ў Рэспубліцы Беларусь на прадмет магчымых злачынстваў супраць чалавечнасці можа стаць важным крокам да забеспячэння адказнасці чальцоў рэжыму Аляксандра Лукашэнкі з траўня 2020 года. Мы згодныя з тым, што ёсць абгрунтаваныя падставы меркаваць, што рэжым Лукашэнкі мог учыніць злачынствы, вызначаныя ў Статуце Міжнароднага крымінальнага суда. Міністэрства замежных справаў разам з іншымі кампетэнтнымі органамі аналізавала гэтае пытанне, і гэты працэс будзе працягнуты. Мы з цікавасцю азнаёмімся з аргументацыяй літоўскага боку, што азначае поўнае падтрыманне літоўскага звароту Міністэрствам замежных справаў Польшчы», – пракаментаваў Белсату Павэл Вроньскі, прэс-сакратар Міністэрства замежных справаў Польшчы.
Нагадаем, літоўскі ўрад 30 верасня на падставе матэрыялаў, сабраных Народным антыкрызісным ўпраўленнем на чале з Паўлам Латушкам, перадаў у Офіс пракурора Міжнароднага крымінальнага суда (ICC) ў Гаазе матэрыялы, якія датычаць здзяйснення прадстаўнікамі рэжыму Аляксандра Лукашэнкі трансгранічных злачынстваў супраць чалавечнасці ў дачыненні беларусаў.
Гэтыя дакументы НАУ рыхтавала з леташняга красавіка. Частка злачынстваў, што закідаюць Лукашэнку, мае трансмежны характар, бо здзяйсняецца не толькі на тэрыторыі Беларусі, але і ў краінах – удзельніцах Рымскага статуту.
Тэса Анэйда belsat.eu
