З адпаведнаю заяваю выступіла былая палітзняволеная і экс-прадстаўніца ў сферы сацыяльнай палітыкі Аб'яднанага пераходнага кабінету Вольга Гарбунова.
«Я хацела вам паведаміць, што мы з камандай «21 траўня» прынялі цяжкое рашэнне паставіць марафон на паўзу», – адзначыла Вольга Гарбунова.
Яна падзякавала ўсім, хто падтрымаў ідэю правесці другі марафон у гэтым годзе і выказаў гатовасць правесці другую трансляцыю.
Але ў той жа час Гарбунова адзначыла: спрабуючы адстаяць правядзенне марафону перад грамадзянскаю супольнасцю і дэмакратычнымі сіламі, яна разам з камандай «не ўлічыла важнага».
,,«На гэты момант мы ў сітуацыі поўнай адсутнасці рэсурсаў (маральных, часавых) для правядзення такой працы. Мы недаацанілі ўздзеяння на нас самых гэтых падзеяў, якія забралі і без таго абмежаваныя валанцёрскія сілы. Мы недаацанілі дзеянняў сілавікоў, што прывялі да скарачэння партнёраў ад медыяў. Нам патрэбны час пераасэнсаваць тое, што адбылося, зрабіць высновы і працу над памылкамі і, магчыма, прапанаваць вам новы фармат супрацы. Але крыху пазней», – заявіла Вольга Гарбунова.
Нагадаем, што першы Марафон салідарнасці «Нам не ўсё адно» для збору сродкаў беларускім палітвязням ды іхным сем’ям прайшоў з 29 да 30 ліпеня 2023 года. Падчас яго сабралі больш за 574 тысячы еўраў.
Суд Цэнтральнага раёну Менску прызнаў відэазапіс з Марафону салідарнасці «экстрэмісцкімі матэрыяламі», а 3 кастрычніка 2023 года на арганізатараў і ўдзельнікаў трансляцыі завялі крымінальную справу паводле ч. 2 арт. 361-2 КК РБ («Фінансаванне экстрэмісцкай дзейнасці»).
Раман Шавель belsat.eu
