навіны

Дэмсілы падрыхтавалі для рэпрэсаваных беларусаў спіс бяспечных і небяспечных для паездак краінаў

Ілюстрацыйны здымак.
Ілюстрацыйны здымак. Фота: www.amazon.pl
podpis źródła zdjęcia

Як паведамляюць стваральнікі спісу, перш за ўсё ён прызначаны для тых беларусаў і беларусак замежжа, якія падчас выбараў 2020 года, а таксама пасля іх бралі ўдзел у акцыях пратэсту ў Беларусі ці па-за яе межамі, вялі ці працягваюць весці актыўную дзейнасць, скіраваную на дэмакратычныя перамены ў Беларусі.

Народныя амбасады Беларусі разам з Офісам Святланы Ціханоўскай падрыхтавалі велізарны спіс бяспечных і небяспечных (на дадзены момант) краінаў Еўропы, Азіі, Афрыкі, Паўночнай і Паўднёвай Амерыкі, Аўстраліі і Акіяніі. Звесткі размешчаныя ў адмысловым спісе пад назваю «Бяспечнае падарожжа» і прызначаныя, у першую чаргу, для палітычных беларускіх актывістаў і актывістак, якія цяпер за мяжою. Стваральнікі спісу паведамляюць, што на дадзены момант спіс няпоўны і паступова ў яго будуць дадаваць новыя краіны.

«Памятайце, што не існуе 100 % спісаў, якія краіны бяспечныя, а якія не. Уся прэзентаваная на старонцы інфармацыя мае выключна азнаямленчы характар на падставе аналізу адкрытых і даступных звестак пра пагадненні, падпісаныя паміж Беларуссю і Расеяй і іншымі краінамі, верагоднасці арышту грамадзянаў Беларусі і далейшай экстрадыцыі, а таксама цяперашніх стасункаў паміж урадамі іншых краінаў і рэжымамі ў Беларусі і Расеі, – папярэджваюць беларусаў. – Калі вы ў вышуку праз Інтэрпол, то нават у бяспечнай краіне, што не супрацоўнічае з аўтарытарнымі рэжымамі ў палітычных справах, вас затрымаюць і вы будзеце пад арыштам, пакуль службы будуць разбірацца, палітычная ў вас справа ці не. Бо рэжым «маскіруе» палітычны пераслед пад іншыя крымінальныя абвінавачанні».

Сумна ад таго, што, калі гартаеш гэты спіс, разумееш, што адзіны ўмоўна бяспечны кантынент для беларусаў цяпер – Аўстралія: там усе краіны пазначаныя зялёным колерам. На астатніх, нават у Афрыцы і Паўднёвай Амерыцы, нас можа чакаць шмат небяспекі. Яшчэ горай ад усведамлення таго, што першая і самая галоўная ў спісе небяспечных для беларусаў краіна, пазначаная чырвоным колерам, – родная Беларусь.

Перад кожнаю паездкаю стваральнікі «Бяспечнага падарожжа» раюць дадаткова вывучаць актуальную інфармацыю пра краіну свайго візіту і спрабаваць высветліць, ці былі там выпадкі экстрадыцый і арыштаў беларусаў і беларусак.

Надзея Вольная belsat.eu

больш па гэтай тэме Глядзіце больш
Item 1 of 4
апошнія
Item 1 of 10