Палітвязню Змітру Дашкевічу дадалі адзін год і тры месяцы зняволення. Пра гэта паведамляе «Наша Ніва» са спасылкаю на сяброў сям'і.
Паводле «Нашай Нівы», Змітру Дашкевічу гэтым разам інкрымінавалі «народны» арт. 342 КК («Актыўны ўдзел у групавых дзеяннях, якія груба парушаюць грамадскі парадак»), а таксама ч. 1 арт. 411 КК («Злоснае непадпарадкаванне патрабаванням адміністрацыі калоніі»).
Суддзя Анастасія Кулік прызнала палітвязня вінаватым і прызначыла яшчэ адзін год і тры месяцы калоніі.
Працэс распачаўся 18 верасня ў судзе Першамайскага раёну Менску.
Нагадаем, Дашкевіч быў затрыманы 23 сакавіка 2022 года. Спачатку яго засудзілі на паўтара года зняволення паводле арт. 342 КК. Незадоўга да выхаду на волю ў ліпені 2023-га супраць палітвязня завялі новую крымінальную справу, за непадпарадкаванне адміністрацыі калоніі (арт. 411 КК). У кастрычніку летась актывісту прысудзілі яшчэ год калоніі.
У траўні 2024 года сталася вядома, што супраць палітвязня распачалі новую крымінальную справу.
Удома Змітра чакае жонка Наста Дашкевіч разам з чатырма малымі дзецьмі. Наста была засуджаная на тры гады «хатняй хіміі».
Глеб Нержын belsat.eu
