Папа Рымскі Францішак прыняў адстаўку з пасады біскупа Гарадзенскай епархіі Аляксандра Кашкевіча ў сувязі з дасягненнем 75-гадовага веку. Пра гэта паведамілі 30 верасня ў прэс-службе Ватыкану.
Новым гарадзенскім біскупам прызначаны біскуп-каад’ютар Уладзімір Гуляй.
Біскуп Аляксандр Кашкевіч кіраваў Гарадзенскай епархіяй ад моманту яе ўтварэння 13 красавіка 1991 года. Ён нарадзіўся ў 1949 годзе ў Літве, скончыў Вышэйшую духоўную семінарыю ў Коўне, служыў у Панявежы і Вільні. У 2006–2015 гадах узначальваў Канферэнцыю каталіцкіх біскупаў у Беларусі.
Ягоны пераемнік, біскуп Уладзімір Гуляй, нарадзіўся ў 1975 годзе ў Ваўкавыску. Скончыў Вышэйшую духоўную семінарыю ў Горадні, а таксама магістратуру і дактарантуру Люблінскага каталіцкага ўніверсітэту. Працаваў у Горадні і Лідзе, выкладаў у каталіцкіх навучальных установах. 5 красавіка 2024 года быў прызначаны біскупам-каад’ютарам Гарадзенскай епархіі.
Якуб Хруст belsat.eu
