На сайце Белтэлерадыёкампаніі ў рубрыцы «Рэкламныя навіны» была апублікаваная навіна са здымкам нібыта ўказу Аляксандра Лукашэнкі. Але выглядае, што такога ўказу не існуе, а сам сайт узламалі.
У апублікаваным на сайце ўказе № 370 «Аб сродках падтрымкі мігрантаў у памежных вобласцях РБ» ад 27 верасня 2024 года гаворыцца, што прадпрымальнікі транспартнай галіны павінны перадаць свой транспарт дзяржаўным органам цягам сямі дзён з дня прызыву. А ўладальнікі дамоў і кватэраў абавязаныя даць іх абласным органам улады.
На сайце прыводзіцца і абгрунтаванне такіх жорсткіх захадаў. «Са словаў кіраўніка Адміністрацыі прэзідэнта Дзмітрыя Крутога, гэтыя пастановы ёсць адказам на апошнюю хвалю чарнаскурых уцекачоў, якая захліснула нашую краіну. Указ прадугледжвае частковую рэквізіцыю транспартных сродкаў і жылых памяшканняў. Мы будзем трымаць вас у курсе далейшых крокаў у гэтым пытанні», – паведамлялася на сайце БТ.
Як піша радыё «Свабода», на Нацыянальным прававым інтэрнэт-партале пад гэтым нумарам выходзіў іншы ўказ, які Аляксандр Лукашэнка падпісаў сёлета 23 верасня, – аб зменах указаў пра інвестыцыйную дзейнасць.
Навіну апублікавалі 29 верасня на сапраўдным сайце Белтэлерадыёкампаніі, tvr.by. Спасылкі на сацсеткі на гэтым сайце вялі на каналы ў сацыяльных сетках Тэлерадыёкампаніі. Усе іншыя навіны адпавядалі тым, што выходзілі на сайце дзяржаўнай кампаніі БелТА.
«Наша Ніва» выказвае думку, што сайт Белтэлерадыёкампаніі ўзламалі.
Але пасля ўсе навіны за 29 і 30 верасня зніклі. Апошнія навіны былі датаваныя 28 верасня. А неўзабаве на сайце Белтэлерадыёкампаніі з'явілася паведамленне пра тое, што «сэрвіс часова недаступны або знаходзіцца на тэхнічным абслугоўванні». Спробу падлучэння прапаноўваюць паўтарыць пазней.
Якуб Хруст belsat.eu
