Новым генеральным сакратаром радыкальнай шыіцкай групоўкі «Хізбула» з Лівану замест забітага Хасана Насралы абралі Гашыма Сафі ад-Дына.
Інфармацыю пра такі выбар Рады шуры «Хізбулы» паведаміў тэлеканал «Al Hadath».
Гашыму Сафі ад-Дыну 60 гадоў. З 2001-га кіруе з выканаўчаю радаю «Хізбулай». Па маці ён стрыечны братам былога лідара «Хізбулы» Хасана Насралы, забітага ў выніку ізраільскай атакі 27 верасня. Ягоны родны брат Абдала Сафі ад-Дын ‒ прадстаўнік арганізацыі ў Іране. Сын жа новага кіраўніка «Хізбулы» ажаніўся з дачкою Гасэма Сулеймані ‒ камандзіра іранскага спецпадраздзялення «эль-Кудс» у складзе Корпусу вартаўнікоў Ісламскай рэвалюцыі (КВІР), забітага ЗША ў 2020 годзе.
Між тым Ізраіль працягвае наносіць удары па тэрыторыю Лівану. Таксама 29 верасня ён атакаваў тэрыторыю ў Емене, падкантрольную ўзброенаму праіранскаму руху хусітаў. Як паведаміў Цагаль, была праведзеная «буйная паветраная аперацыя» з удзелам дзясяткаў баявых, заправачных і выведных самалётаў.
Паводле заявы, аперацыя скіраваная супраць вайсковых аб’ектаў «тэрарыстычнага рэжыму хусітаў» у аль-Хадайдзе і Рас-Ісе ‒ электрастанцыі і порту, што выкарыстоўваецца для імпарту нафты.
«Для нас ніякае месца не будзе занадта далёкім», ‒ сказаў у асобнай заяве міністр абароны Ізраілю Ёаў Галянт.
Прадстаўнік хусітаў Мухамэд аль-Бухайці назваў нядзельны напад «брытанска-амерыканскай агрэсіяй», што выкарыстоўвае Ізраіль як прыкрыццё.
Цяперашнія баявыя дзеянні між Ізраілем і ліванскай групоўкаю «Хізбула» ‒ найбольш смертаносныя з часу вайны 2006 года. Але абодва бакі быццам бы не хочуць ваяваць, проста пакуль не могуць спыніць эскалацыі.
У нефармальную антыізраільскую «Вось супраціву» пад кіраўніцтвам Ірану залучаюць ліванскую «Хізбулу» і палестынскі «Хамас», рэжым Башара Асада ў Сірыі, іракскія Сілы народнай мабілізацыі, еменскіх хусітаў ды іншыя сілы на Блізкім Усходзе.
Якуб Хруст belsat.eu
