Радослаў Сікорскі размаўляў пра гэта ў Дзяржаўным дэпартаменце. Дэталяў перамоваў дыпламат не абнародаваў.
У Злучаных Штатах кіраўнік польскай дыпламатыі браў удзел у сесіі Генеральнай асамблеі ААН, прамаўляў на пасяджэнні Рады бяспекі ААН, выступіў з лекцыяй ва Універсітэце Джонза Гопкінза. Пра вынікі візіту Радослаў Сікорскі расказаў на відэа, апублікаваным на старонцы МЗС Польшчы ў сацыяльнай сетцы X.com:
,,«У Вашынгтоне я сустрэўся з Джэйкам Саліванам, дарадцам у нацыянальнай бяспецы. Таксама меў сустрэчу ў Дзяржаўным дэпартаменце з прадстаўніком у справах закладнікаў і палітычных вязняў. Гэта вельмі важна ў кантэксце зняволеных беларускіх апазіцыянераў, у тым ліку Анджэя Пачобута».
Анджэй Пачобут – актывіст польскай меншасці, журналіст. Яго абвінавацілі ў «закліках да санкцыяў» і «распальванні варожасці» ды пасадзілі на 8 гадоў. Пачобут адбывае тэрмін у самай жорсткай калоніі Беларусі.
Паводле праваабарончага цэнтру «Вясна», цяпер у Беларусі 1325 палітвязняў, паводле ініцыятывы «Dissidentby» – 1403.
Сцяпан Кубік belsat.eu
