У Менску сцвярджаюць, што «еўрапейскія сябры» адмаўляюцца акрэдытаваць лабараторыю, дзе можна было б зрабіць неабходны аналіз. У прэс-службе Еўракамісіі заявілі «Белсату», што лабараторыяў не акрэдытоўваюць, а ўлады Беларусі самыя маюць развязаць гэтую праблему.
Праблема ў тым, што зрабіць тэст можна толькі ў акрэдытаванай лабараторыі, а ў Беларусі такой няма ніводнай.
У Дэпартаменце ветэрынарнага і харчовага нагляду Міністэрства сельскай гаспадаркі і харчавання раней паведамілі, што ў Беларусі такое тэставанне робіць Віцебская абласная ветэрынарная лабараторыя:
«Мы ліставаліся з нашымі сябрамі з ЕЗ, спачатку яны нам сказалі, што наступная акрэдытацыя будзе налета, а потым наагул адмовіліся яе ладзіць, перасталі адказваць. Хаця ў Віцебску мы праводзім усе магчымыя даследаванні, там добрая лабараторыя».
У прэсавай службе Еўракамісіі заявілі «Белсату», што гэты еўрапейскі орган акрэдытацыяй не займаецца:
,,«Камісія не зацвярджае лабараторыяў у краінах, што не ўваходзяць у ЕЗ. Яны маюць быць акрэдытаваныя або прызначаныя кампетэнтным органам гэтай краіны пры ўмове, што яны адпавядаюць патрабаванням рэгламенту ЕЗ. Беларусь не праінфармавала Еўракамісію пра наяўнасць такіх лабараторыяў».
У Еўракамісіі таксама адзначылі, што акрэдытацыю здзяйсняе «нацыянальны або міжнародны орган», і працэс можа заняць да двух гадоў:
«Час, неабходны для акрэдытацыйнай ацэнкі, залежыць ад сферы дзейнасці лабараторыі, колькасці работнікаў і складанасці аперацыяў тэставання. Уся працэдура можа цягнуцца ад некалькіх месяцаў да двух гадоў».
Пасля гэтага «кампетэнтны орган Беларусі» мусіць перадаць Еўракамісіі назву і кантакты лабараторыі.
Пытанне пра тое, ці ідуць якія-кольвек перамовы з уладамі Беларусі наконт акрэдытацыі, Еўракамісія перакіравала ў Менск: «Гэта пытанне да беларускіх кампетэнтных органаў».
Пакуль жа беларусы, якія едуць у ЕЗ з гадаванцамі, вымушаныя рабіць у Расеі тэст на колькасць антыцелаў да шаленства або звяртацца ў ветклінікі ў нашай краіне, што надаюць паслугу пасярэднікаў: кроў бяруць на месцы, а біяматэрыял для аналізу возяць у Маскву. Мінімальна гэта каштуе 533 рублі.
Дар'я Форман, Сцяпан Кубік belsat.eu
