Дом у менскіх Драздах прадалі за $ 2,9 млн, і гэтая ўгода сталася найбуйнейшаю на рынку нерухомасці з даваеннага 2021 года. І ў Беларусі яшчэ багата прапановаў для тых, у каго заваляліся лішнія мільёны.
Пабудова 2009 года, два ўзроўні, 432 квадратныя метры, убудаваны гараж, 11 сотак зямлі, альтанка з зонаю барбекю, мікрараён Радужны ў Драздах – вось складнікі кошту дому, прададзенага ў жніўні за $ 2,85 млн.
Гэта найдаражэйшы дом, які купілі ў Беларусі пасля 2021 года. Тады была ўгода на $ 3,35 млн.
У сёлетнім жніўні ў Менску аформілі яшчэ адну буйную дамову: у мікрараёне Зацень недалёка ад тых жа Драздоў прадалі трохузроўневы дом плошчаю 671 квадратны метр за $ 2,15 млн. І гэта без аздаблення. Будынак новы, сёлетні. У дадатак новы гаспадар атрымаў 15 сотак зямлі.
У жніўні самая дарагая кватэра ў сталіцы каштавала пакупніку $ 381 тысячу: нерухомасць у жылым комплексе «Камфорт Парк» паміж вуліцамі Ціміразева і Грыбаедава. Дом свежанькі, здадзены напрыканцы 2023 года, агароджаная тэрыторыя і кругладзённае відэаназіранне – усё як мае быць. Кватэра свабоднага планавання плошчаю 114 квадратных метраў.
Нямоцна ад сталіцы адстаюць рэгіёны. Самым дарагім жытлом, прададзеным у жніўні за межамі Менскай вобласці, сталася кватэра ў Магілёве. Яна знайшла новага ўласніка за $ 300 тыс.
Плошча кватэры – 331 квадратны метр, цэнтр гораду. Дом агароджаны, на тэрыторыі – крытыя паркінгі і ўласны падворак.
Пры гэтым самыя дарагія аб'екты нерухомасці ў Беларусі яшчэ чакаюць сваіх пакупнікоў. Напрыклад, катэдж у «элітным паселішчы закрытага тыпу» на вуліцы Кальцова побач з Цнянскім вадасховішчам. За дом плошчаю амаль 500 квадратных метраў просяць $ 4,5 млн. У абвестцы пазначана, што «набыць прапануюць не будынак, а статуснасць і адчуванні». Шкура мядзведзя ў більярднай, рогі на сценах і самавар на стале – у камплекце.
За $ 3,4 млн прадаюць катэдж у Веснінцы каля вадасховішча Дразды. Натуральна, усе выгоды, у тым ліку саўна, ёсць, плюс участак 15 сотак з ландшафтным дызайнам. Прадавец падкрэслівае, што там ніхто не жыў, у аздабленні выкарыстоўваліся імпартныя матэрыялы, будынак абсталяваны сістэмаю «Разумны дом».
«Усяго толькі» $ 1,4 млн просяць за шасціпакаёвую кватэру ў жылым комплексе «D3» на праспекце Пераможцаў. Плошча – 270 квадратных метраў. Прадавец з гонарам адзначае, што гэта адзіна кватэра на апошнім, 26-м паверсе.
У квартале «Дэпо» на вуліцы Кісялёва за $ 1,25 млн можна прыдбаць шасціпакаёўку, у якую яшчэ давядзецца ўваліць багата грошай, бо яна без аздаблення. Затое ў абвестцы нахвальваюць лакацыю: і цэнтр гораду, і шмат зелені, і парковачныя месцы, і кладоўка.
Агулам у жніўні, паводле папярэдніх звестак Нацыянальнага кадастравага агенцтва, у сталіцы былі прададзеныя 1878 кватэраў, што на 1,5 % меней, чымся ў ліпені і прыкладна столькі ж, колькі ў жніўні летась. Амаль палова ўсіх угодаў – купля-продаж аднапакаёвак.
Сярэдні кошт квадратнага метра дасягнуў $ 1583, і гэта максімум за апошнія 9 гадоў.
Аднапакаёвыя кватэры ў Менску цяпер каштуюць у сярэднім $ 60 тыс., двухпакаёвыя – $ 69,9 тыс., трохпакаёвыя – $ 85,5 тыс.
Сцяпан Кубік belsat.eu
