Лукашэнка палічыў, што Беларусь здольна самастойна распрацаваць мабільны тэлефон з уласным праграмным забеспячэннем, бо «гаджэты ператварылі ў баявую зброю».
Лукашэнка лічыць, што краіне гэта пад сілу, бо ў Беларусі ўмеюць рабіць аўтобусы і электробусы, легкавыя аўтамабілі, трактары і камбайны, «якія па якасці не горшыя за лепшыя імпартныя». Узгадаў ён нават стварэнне шматпакутнага беларускага ноўтбука (таго самага Horizont H-book MAK4, які насамрэч аказаўся пераназванай версіяй кітайскага Itel Spirit 2).
«Ёсць дасягненні ў мікраэлектроніцы, нават ноўтбук свой зрабілі, у інфармацыйных тэхналогіях, фармацэўтыцы, біятэхналогіях. Гэта я толькі малую частку назваў. Краіна развіваецца, людзі таксама развіваюцца», – 27 верасня заявіў ён студэнтам ВНУ інжынерна-тэхнічнага профілю, піша БелТА.
А тэлефоны трэба зрабіць, каб не было, як у Ліване, дзе ў верасні адбыліся масавыя выбухі прыладаў сувязі, якімі карысталіся чальцы радыкальнай групоўкі «Хізбула».
«І айчынны мабільны тэлефон, пра які шмат-шмат зараз кажуць, мы таксама зробім. Павінны зрабіць, таму што гаджэты сёння, як вы бачылі ў апошні час, ператварылі ў баявую зброю. Гэта ўжо пытанне нацыянальнай бяспекі», – кажа Лукашэнка.
Тэса Анэйда belsat.eu
