У крымінальнай справе пра напад на расейскага апазіцыянера Леаніда Волкава, щто расследуецца ў Польшчы, восем чалавек. Адзін з іх – беларус. У Нацыянальнай пракуратуры Польшчы расказалі «Белсату», у чым яго падазраюць.
Прадстаўнік Нацыянальнай пракуратуры Польшчы паведаміў «Белсату», што ў справе нападу на расейскага апазіцыянера Леаніда Волкава абвінавачанні выставілі васьмі асобам. Адна з іх – грамадзянін Беларусі Віктар П., якога падазраюць у трох злачынствах, у тым ліку паводле арт. 18 і арт. 119 Крымінальнага кодэксу Польшчы.
Артыкул 119 завецца «Дыскрымінацыя», але датычыць гвалтоўных дзеянняў або пагрозаў на падставе нацыянальнай, этнічнай, расавай, палітычнай ці рэлігійнай прыналежнасці або яе адсутнасці. Артыкул 18 – пра формы саўдзелу. Ён мае тры часткі: кіраванне злачынствам або загад учыніць яго; падбухторванне да злачынства; спрыянне шляхам прадастаўлення прылады, транспарту ці парадаў або бяздзейнасць у спыненні злачынства.
Адносна падазраванага ўжытая мера стрымання ў выглядзе ізаляцыі, вядуцца далейшыя працэсуальныя дзеянні і збор доказаў. Пасля збору матэрыялу будзе выстаўленае абвінавачванне.
Польская пракуратура супольна з Агенцыяй унутранай бяспекі вядуць шматпланавае расследаванне адносна нападаў на расейскіх апазіцыянераў, пераважна звязаных з Фондам барацьбы з карупцыяй, створаным Аляксеем Навальным у 2011 годзе. Справа датычыць нападаў на расейскіх актывістаў як у краінах Еўропы, так і ў Паўночнай і Паўднёвай Амерыцы.
Раней сталася вядома, што сярод падазраваных паводле справе пра напад на расейскіх апазіцыянераў – расейскі юрыст Анатолій Бліноў. Ён быў затрыманы 13 верасня. Пракуратура выставіла яму тры абвінавачванні, у тым ліку ў збіцці Волкава «з прычыны ягонай нацыянальнай, палітычнай прыналежнасці і палітычнай дзейнасці». Бліноў арыштаваны на тры месяцы.
Расейскі «Фонд барацьбы з карупцыяй» заяўляе, што замах на Леаніда Волкава 12 сакавіка 2024 года быў замоўлены саўладальнікам «ЮКОС» Леанідам Неўзліным, які даручыў юрысту Блінову ўсё арганізаваць. Неўзлін у сваю чаргу яшчэ 5 жніўня накіраваў у літоўскую паліцыю заяву, у якой сцвярджае, што Бліноў наўмысна стварае ўражанне, што за нападам на Волкава стаіць Неўзлін.
Падчас нападу на Волкава злачынца разбіў шкло ў машыне, распыліў слезацечны газ і збіў расейскага апазіцыянера малатком, у выніку чаго ў мужчыны была зламаная рука.
Летась у красавіку паводле справы пра замах былі затрыманыя двое грамадзянаў Польшчы – Ігар Ц. і Максіміліян К. Абодвум выставілі абвінавачванне ў гвалце на падставе нацыянальнасці і палітычнай дзейнасці. Прэм’ер-міністр Польшчы Дональд Туск заяўляў, што напад на Волкава замовіў грамадзянін Беларусі.
Алесь Наваборскі, Дар'я Форман belsat.eu
